Contoh Teks

ᮊᮤ ᮘᮨᮔᮨᮁ

ᮃᮚ ᮠᮤᮏᮤ ᮏᮜ᮪ᮙ ᮍᮛᮔ᮪ᮔ ᮊᮤ ᮘᮨᮔᮨᮁ. ᮄᮙᮂᮔ ᮓᮤ ᮞᮤᮞᮤ ᮞᮌᮛ, ᮃᮛᮤ ᮌᮝᮦᮔ ᮒᮩ ᮃᮚ ᮓᮩᮄ ᮍᮔ᮪ ᮍᮥᮞᮩᮕ᮪ ᮊᮥ ᮏᮛᮥᮙ᮪, ᮉᮕᮔ᮪ᮔ ᮘᮊᮒᮥᮜ᮪. ᮃᮛᮤ ᮕᮙᮏᮤᮊᮔ᮪ᮔ ᮕᮥᮛᮂ ᮘᮥᮘᮥᮛᮥᮂ ᮔᮥᮒᮥ, ᮍᮛᮂ ᮘᮊᮒᮥᮜ᮪ ᮊᮩᮁ ᮉᮕᮔ᮪ ᮅᮞᮩᮕ᮪. ᮅᮀᮌᮜ᮪ ᮕᮧᮆ ᮊᮤ ᮘᮨᮔᮨᮁ ᮌᮝᮦᮔ ᮍᮔ᮪ ᮍᮥᮞᮩᮕ᮪ ᮘᮆ; ᮊᮤᮒᮥ ᮓᮩᮄ ᮕᮙᮏᮤᮊᮔᮔ ᮅᮀᮌᮜ᮪ ᮕᮧᮆ ᮘᮥᮘᮥᮛᮥᮂ ᮔᮥᮒᮥ ᮘᮆ. ᮌᮩᮞ᮪ ᮒᮤᮜᮥ ᮒᮠᮥᮔ᮪ ᮜᮤᮜᮔ, ᮊᮤ ᮘᮨᮔᮨᮁ ᮒᮩ ᮃᮚ ᮓᮩᮄ ᮌᮝᮦᮔ ᮍᮔ᮪ ᮍᮥᮞᮩᮕ᮪ ᮘᮆ ᮓᮤᮔ ᮞᮤᮞᮤ ᮞᮌᮛ, ᮒᮒᮕᮤ ᮝᮨᮜᮦᮂ, ᮒᮩ ᮙᮩᮔᮀ ᮜᮅᮊ᮪ ᮠᮤᮏᮤ-ᮠᮤᮏᮤ ᮃᮎᮔ᮪, ᮊᮥ ᮞᮘᮘ᮪ ᮅᮞᮩᮕ᮪ᮔ ᮜᮨᮙ᮪ᮕᮨᮀ, ᮑ ᮆᮒ ᮏᮛᮥᮙ᮪; ᮏᮓᮤ ᮜᮅᮊ᮪ ᮓᮤ ᮞᮌᮛ ᮒᮤ ᮘᮒᮔ᮪ ᮍᮥᮛᮍᮔ᮪ ᮙᮂ ᮃᮀᮌᮥᮁ ᮘᮩᮊᮤ ᮜᮤᮜ ᮘᮩᮊᮤ ᮍᮛᮧᮞᮃᮔ᮪, ᮏᮓᮤ ᮘᮛᮔᮊᮔ᮪ ᮊᮜᮀᮊᮥᮀ ᮛᮧᮞᮔ.

ᮘᮛᮀ ᮌᮩᮞ᮪ ᮔᮨᮕᮤ ᮊᮔ ᮒᮥᮏᮥᮂ ᮒᮠᮥᮔ᮪ ᮍᮥᮞᮩᮕ᮪ᮔ ᮆᮒ ᮊᮤ ᮘᮨᮔᮨᮁ, ᮒᮤ ᮓᮤᮑ ᮊᮒᮤᮍᮜᮤ ᮊᮥ ᮛᮒᮥ ᮜᮅᮊ᮪, ᮚᮦᮔ᮪ ᮜᮅᮊ᮪ ᮓᮤ ᮞᮌᮛ ᮞᮊᮤᮒᮥ ᮍᮜᮧᮘᮃᮔᮔ. ᮒᮤ ᮓᮤᮑ ᮒᮥᮜᮥᮚ᮪ ᮞᮞᮅᮛᮔ᮪ ᮊ ᮘᮜᮓ᮪ᮔ ᮊᮤᮉ ᮜᮠᮤᮛᮔᮔ: “ᮉᮚ᮪! ᮃᮚᮩᮔ ᮘᮛᮥᮓᮊ᮪, ᮅᮛᮀ ᮊᮥᮓᮥ ᮑᮃᮂ ᮊᮎᮤᮓ ᮙᮥᮜᮀ ᮒᮛᮤᮙ, ᮏᮩᮀ ᮊᮛᮥᮑ ᮊ ᮊᮤ ᮘᮨᮔᮨᮁ, ᮞᮘᮘ᮪ ᮜᮅᮊ᮪ ᮞᮊᮤᮉ ᮜᮧᮘᮔ ᮅᮀᮌᮜ᮪ ᮕᮧᮆ ᮊᮥ ᮙᮔᮦᮂᮔ ᮓᮤᮕᮛᮘᮔ᮪ ᮘᮆ”.

ᮒᮤ ᮓᮤᮑ ᮛᮒᮥ ᮜᮅᮊ᮪ ᮑᮅᮁ ᮊ ᮠᮤᮏᮤ ᮘᮜᮓ᮪ᮔ, ᮑᮆᮒ ᮜᮅᮊ᮪ ᮜᮤᮊ, ᮒᮥᮜᮥᮚ᮪ ᮓᮤᮠᮥᮃᮕᮔ᮪ ᮄᮔ᮪ᮒᮨᮔ᮪ ᮞᮌᮨᮓᮦ ᮊᮜᮕ, ᮞᮀᮌᮩᮞ᮪ ᮊᮤᮒᮥ, ᮊᮥ ᮛᮒᮥ ᮓᮤᮕᮤᮝᮛᮀ ᮑᮀᮌᮥᮒ᮪ ᮊᮔ ᮅᮞᮩᮕ᮪ ᮊᮤ ᮘᮨᮔᮨᮁ ᮒᮦᮃ.

ᮌᮔ᮪ᮎᮀᮔ ᮌᮨᮕ᮪ ᮘᮆ ᮓᮤᮌᮦᮌᮦᮜ᮪ ᮅᮞᮩᮕ᮪ ᮊᮤ ᮘᮨᮔᮨᮁ ᮒᮦᮂ.

ᮊᮤ ᮘᮨᮔᮨᮁ ᮊᮌᮨᮒᮩᮔ᮪ ᮕᮤᮞᮔ᮪ ᮊᮥᮞᮘᮘ᮪ ᮏᮩᮏᮩᮁᮔ ᮊᮛᮞ ᮍᮨᮛᮨᮑᮨᮓ᮪. ᮃᮔ ᮓᮤᮎᮨᮔ᮪ᮒᮧᮊ᮪, ᮘᮨᮒ᮪ ᮙᮩᮔᮀ ᮜᮅᮊ᮪ ᮌᮨᮓᮦ ᮕᮤᮞᮔ᮪.

ᮊᮎᮤᮓ ᮕᮤᮞᮔ᮪ ᮊᮤ ᮘᮨᮔᮨᮁ ᮃᮒᮧᮠᮩᮔᮔ, ᮞᮁᮒ ᮒᮥᮜᮥᮚ᮪ ᮆᮒ ᮜᮅᮊ᮪ ᮓᮤᮘᮝ ᮘᮜᮤᮊ᮪.

ᮘᮛᮀ ᮓᮒᮀ ᮊ ᮄᮙᮂᮔ, ᮒᮥᮜᮥᮚ᮪ ᮍᮧᮙᮧᮀ ᮊ ᮕᮙᮏᮤᮊᮔᮔ, ᮕᮧᮊ᮪ᮔ: “ᮑᮄ, ᮃᮚᮩᮔ ᮙᮔᮦᮂ ᮙᮞᮤᮀ ᮌᮨᮒᮧᮜ᮪ ᮘᮥᮘᮥᮛᮥᮂ ᮔᮥᮒᮥ ᮒᮦᮂ, ᮑᮆᮒ ᮍᮛᮂ ᮊᮩᮁ ᮕᮤᮉᮕᮔᮩᮔ᮪”.

ᮒᮤᮔ ᮊᮎᮤᮓ ᮊᮥᮙᮝᮥᮜᮔ ᮊ ᮞᮜᮊᮤ, ᮕᮙᮏᮤᮊᮔ᮪ ᮊᮤ ᮘᮨᮔᮨᮁ ᮒᮦᮂ ᮌᮩᮞ᮪ ᮒᮩ ᮍᮥᮛᮥᮞ᮪-ᮍᮥᮛᮥᮞ᮪ ᮊᮔ ᮕᮊᮦᮃᮔ᮪; ᮆᮞ᮪ᮒᮥ ᮝᮥᮀᮊᮥᮜ᮪ ᮘᮥᮘᮥᮛᮥᮂ ᮔᮥᮒᮥ ᮘᮆ, ᮙᮜᮂ ᮞᮤᮛᮂᮔ ᮇᮌᮦ ᮙᮔᮤ ᮕᮤᮔᮥᮂ ᮊᮥ ᮘᮊᮒᮥᮜ᮪.

ᮎᮦᮊ᮪ ᮕᮙᮏᮤᮊᮔᮔ: “ᮊᮤ ᮘᮨᮔᮨᮁ, ᮔᮠ ᮆᮒ ᮜᮅᮊ᮪ ᮒᮦᮂ ᮘᮨᮒ᮪ ᮠᮨᮔ᮪ᮒᮩ ᮓᮤᮒᮧᮜᮤᮂ, ᮞᮥᮙᮝᮧᮔ᮪ᮔ ᮓᮤᮓᮠᮁ, ᮃᮀᮌᮥᮁ ᮓᮤᮕᮛᮧᮞ᮪ ᮊᮥ ᮅᮕᮤᮂ”. ᮞᮘᮧᮒ᮪ ᮕᮙᮏᮤᮊᮔᮔ ᮍᮧᮙᮧᮀ ᮊᮤᮒᮥ, ᮊᮤ ᮘᮨᮔᮨᮁ ᮒᮦᮂ ᮄᮔ᮪ᮓᮤᮒ᮪ ᮊ ᮞᮤᮞᮤ ᮘᮞᮤᮞᮤᮁ, ᮘᮛᮤ ᮙᮝ ᮜᮅᮊ᮪ ᮒᮦᮃ.

ᮘᮛᮀ ᮔᮨᮕᮤ ᮊ ᮓᮤᮑ, ᮊᮘᮨᮔᮨᮛᮔ᮪ ᮃᮚ ᮔᮀᮊᮧᮓ ᮊᮕᮜ᮪ ᮊᮩᮁ ᮜᮤᮝᮒ᮪. ᮒᮤ ᮓᮤᮑ ᮊᮤ ᮘᮨᮔᮨᮁ ᮒᮥᮜᮥᮚ᮪ ᮎᮨᮎᮨᮜᮥᮊᮔ᮪ ᮊ ᮔᮀᮊᮧᮓ ᮘᮛᮤ ᮑᮨᮊᮨᮜᮔ᮪ ᮏᮩᮏᮩᮁ ᮓᮤᮔ ᮞᮤᮞᮤ ᮞᮌᮛ, ᮕᮧᮊ᮪ᮔ: “ᮏᮥᮛᮍᮔ᮪ ᮔᮀᮊᮧᮓ, ᮄᮉ ᮊᮥᮛᮤᮀ ᮝᮤᮃᮒ᮪ ᮜᮅᮊ᮪ ᮠᮒᮥᮛᮔ᮪ ᮛᮏ ᮓᮤ ᮃᮜᮞ᮪ ᮕᮩᮔ᮪ᮒᮞ᮪. ᮙᮔᮝᮤ ᮘᮆ ᮛᮏ ᮃᮚ ᮠᮝᮒᮧᮞ᮪ᮔ ᮊ ᮊᮥᮛᮤᮀ ᮊᮥ ᮃᮛᮧᮞ᮪ ᮞᮎᮧᮙᮧᮒ᮪, ᮘᮛᮥᮘᮥᮒᮔ᮪ ᮞᮎᮤᮝᮤᮒ᮪, ᮓᮥᮄᮒ᮪ ᮞᮕᮦᮞᮦᮁ”.

“ᮙᮜᮂᮙᮔ᮪ᮓᮁ ᮘᮆ ᮠᮝᮨᮜᮞᮩᮔ᮪ ᮊ ᮔᮥ ᮒᮩ ᮌᮓᮥᮂ”.

ᮜᮠᮤᮛᮔ᮪ ᮔᮀᮊᮧᮓ: “ᮞᮧᮊ᮪ ᮘᮆ ᮒᮩᮔ᮪ᮓᮩᮔ᮪ ᮊ ᮓᮤᮑ, ᮊᮔ ᮕᮛᮠᮥ”.

ᮒᮥᮜᮥᮚ᮪ ᮊᮥ ᮊᮤ ᮘᮨᮔᮨᮁ ᮓᮤᮃᮞᮥᮕ᮪ᮊᮩᮔ᮪ ᮆᮒ ᮜᮅᮊ᮪ ᮊᮔ ᮕᮛᮠᮥ.

ᮒᮤ ᮓᮤᮑ ᮔᮀᮊᮧᮓ ᮜᮚᮁ ᮊ ᮃᮜᮞ᮪ ᮕᮩᮔ᮪ᮒᮞ᮪.

ᮊᮊᮧᮎᮕ᮪ᮊᮩᮔ᮪, ᮘᮛᮀ ᮌᮩᮞ᮪ ᮓᮧᮀᮊᮕ᮪ ᮊ ᮔᮌᮛ ᮃᮜᮞ᮪ ᮕᮩᮔ᮪ᮒᮞ᮪, ᮔᮀᮊᮧᮓ ᮒᮦᮂ ᮈᮀᮌᮜ᮪ ᮔᮌ᮪ᮓᮩᮠᮩᮞ᮪ ᮊ ᮛᮏ, ᮊᮤᮉ ᮕᮤᮅᮔ᮪ᮏᮥᮊ᮪ᮔ: “ᮏᮤᮞᮤᮙ᮪ ᮃᮘ᮪ᮓᮤ ᮒᮓᮤ ᮙᮨᮔ᮪ᮓᮊ᮪ ᮠᮤᮏᮤ ᮏᮨᮜᮨᮙ, ᮝᮞ᮪ᮒᮔ ᮊᮤ ᮘᮨᮔᮨᮁ, ᮊᮩᮁ ᮍᮥᮞᮩᮕ᮪ ᮓᮤᮔ ᮞᮤᮞᮤ ᮞᮌᮢ, ᮎᮨᮎᮨᮜᮥᮊᮔ᮪ ᮊ ᮏᮤᮞᮤᮙ᮪ ᮃᮘ᮪ᮓᮤ ᮞᮀᮌᮨᮙ᮪ᮔ ᮍᮝᮤᮃᮒᮔ᮪ ᮜᮅᮊ᮪ ᮊᮩᮁ ᮠᮒᮥᮛᮔ᮪ ᮊᮀᮏᮨᮀ ᮛᮏ”.

ᮓᮝᮥᮠᮔ᮪ ᮛᮏ ᮊ ᮔᮀᮊᮧᮓ: “ᮙᮔ ᮃᮚᮩᮔ ᮜᮅᮊ᮪ᮔ?”

ᮕᮤᮅᮔ᮪ᮏᮥᮊ᮪ ᮔᮀᮊᮧᮓ: “ᮞᮥᮙᮥᮠᮥᮔ᮪, ᮄᮉ, ᮓᮤᮕᮛᮧᮞ᮪ ᮓᮤᮔ ᮅᮕᮤᮂ. ᮔᮍᮤᮀ ᮝᮤᮃᮒ᮪ᮔ ᮊᮤ ᮘᮨᮔᮨᮁ ᮊ ᮏᮤᮞᮤᮙ᮪ ᮃᮘ᮪ᮓᮤ ᮞᮨᮏ ᮑᮥᮠᮥᮔ᮪ᮊᮩᮔ᮪ ᮃᮛᮧᮔ᮪, ᮃᮁᮒᮧᮞ᮪ ᮞᮛᮨᮀ ᮜᮥᮀᮞᮥᮛᮔ᮪ ᮕᮍᮀᮌᮧ; ᮊᮤᮒᮥ ᮇᮌᮦ ᮙᮔᮝᮤ ᮃᮚ ᮃᮞᮤᮂ ᮕᮤᮝᮨᮜᮞ᮪ ᮊᮀᮏᮨᮀ ᮛᮏ; ᮞᮊᮤᮒᮥ ᮝᮤᮃᮒ᮪ᮔ ᮊ ᮏᮤᮞᮤᮙ᮪ ᮃᮘ᮪ᮓᮤ”.

ᮞᮅᮁ ᮛᮏ: “ᮞᮧᮊ᮪ ᮘᮆ ᮓᮤ ᮓᮤᮑ, ᮊᮩᮁ ᮔᮇᮔ᮪ ᮜᮅᮊ᮪ ᮊᮤᮒᮥ ᮏᮩᮀ ᮌᮩᮞ᮪ ᮘᮅ. ᮙᮩᮛᮩᮔᮥᮁᮊ ᮙᮧ ᮈᮑ ᮘᮩᮔᮀ ᮓᮤᮓᮠᮁ?”

ᮒᮤ ᮓᮤᮑ ᮊᮥ ᮛᮏ ᮆᮒ ᮜᮅᮊ᮪ ᮓᮤᮎᮧᮆᮛᮔ᮪ ᮊᮥ ᮒᮨᮒᮨᮊᮨᮔ᮪, ᮘᮨᮒ᮪ ᮃᮚ ᮃᮔᮥ ᮍᮌᮧᮛᮧᮜᮧᮀ ᮒᮤᮔ ᮕᮩᮏᮤᮒ᮪ ᮜᮅᮊ᮪ ᮒᮦᮂ.

ᮘᮛᮀ ᮓᮤᮒᮤᮍᮜᮤ ᮊᮥ ᮛᮏ, ᮘᮨᮒ᮪ ᮄᮔ᮪ᮒᮨᮔ᮪, ᮌᮩᮝᮒ᮪ ᮊᮥ ᮛᮏ ᮓᮤᮛᮧᮔ᮪ᮒᮧᮊ᮪, ᮓᮤᮒᮤᮒᮤᮙᮀ ᮘᮛᮤ ᮞᮞᮅᮛᮔ᮪. ᮊᮤᮉ ᮜᮠᮤᮛᮔᮔ: “ᮄᮉ ᮄᮔ᮪ᮒᮨᮔ᮪, ᮜᮙᮥᮔ᮪ ᮓᮤᮘᮩᮜᮤ ᮊᮥ ᮔᮌᮛ, ᮙᮥᮔ᮪ ᮓᮤᮒᮤᮙ᮪ᮘᮀ ᮌᮨᮓᮦ ᮊᮦᮔᮦᮂ ᮠᮁᮌ ᮄᮔ᮪ᮒᮨᮔ᮪”.

ᮌᮔ᮪ᮎᮀᮔ, ᮓᮤᮞᮅᮁ ᮓᮩᮄ ᮆᮒ ᮔᮀᮊᮧᮓ.

ᮘᮛᮀ ᮓᮧᮀᮊᮕ᮪ ᮊ ᮕᮚᮥᮔᮩᮔ᮪ ᮛᮏ, ᮛᮏ ᮍᮜᮠᮤᮁ: “ᮊᮤ ᮔᮀᮊᮧᮓ, ᮅᮜᮂ ᮝᮊ ᮜᮚᮁ, ᮊᮙᮤ ᮛᮦᮊ᮪ ᮘᮛᮀ ᮊᮤᮛᮤᮙ᮪ ᮊ ᮊᮤ ᮘᮨᮔᮨᮁ”.

“ᮅᮔ᮪ᮏᮥᮊ᮪ ᮞᮥᮙᮀᮌ”, ᮞᮀᮌᮨᮙ᮪ᮔ ᮊᮤ ᮔᮀᮊᮧᮓ.

ᮌᮔ᮪ᮎᮀᮔ, ᮛᮏ ᮔᮤᮙ᮪ᮘᮜᮔ᮪ ᮑᮤᮉᮔ᮪ ᮎᮛᮀᮊ ᮊ ᮕᮒᮤᮂ ᮛᮦᮃᮔ ᮒᮥᮏᮥᮂ, ᮏᮀᮊᮥᮀᮔ ᮞᮒᮧᮆᮜ᮪, ᮌᮨᮓᮦᮔ ᮜᮤᮙ ᮊᮊᮤ. ᮘᮛᮀ ᮌᮩᮞ᮪ ᮞᮓᮤᮃ, ᮛᮏ ᮔᮤᮙ᮪ᮘᮜᮔ᮪ ᮓᮩᮄ: “ᮊᮥᮓᮥ ᮞᮓᮤᮃ ᮃᮛᮧᮔ᮪ ᮞᮁᮒ ᮃᮞᮥᮕ᮪ᮊᮩᮔ᮪ ᮊᮔ ᮎᮛᮀᮊ ᮒᮦᮃ, ᮏᮩᮀ ᮓᮤᮜᮥᮠᮥᮁᮔ ᮒᮥᮙ᮪ᮕᮍᮔ᮪ ᮓᮥᮄᮒ᮪ ᮏᮩᮀ ᮕᮕᮊᮦᮃᮔ᮪”.

ᮎᮛᮀᮊ ᮒᮥᮏᮥᮂ ᮕᮤᮔᮥᮂ ᮊᮘᮦᮂ: ᮕᮒᮨᮍᮂ ᮓᮥᮄᮒ᮪, ᮕᮊᮦᮃᮔ᮪ ᮏᮩᮀ ᮃᮛᮧᮔ᮪, ᮓᮤᮒᮥᮛᮥᮘᮔ᮪ ᮓᮩᮄ ᮒᮤ ᮜᮥᮠᮥᮁᮔ ᮊᮥ ᮃᮛᮧᮔ᮪, ᮞᮥᮕᮚ ᮒᮩ ᮊᮒᮛ ᮃᮚ ᮕᮊᮦᮃᮔ᮪ ᮏᮩᮀ ᮓᮥᮄᮒ᮪.

ᮈᮀᮌᮜ᮪ᮔ, ᮊᮥ ᮛᮏ ᮓᮤᮕᮤᮝᮛᮀ ᮓᮤᮊᮥᮔ᮪ᮏᮜ᮪ ᮊ ᮊᮕᮜ᮪.

ᮊᮎᮒᮥᮁᮊᮩᮔ᮪ ᮔᮀᮊᮧᮓ ᮒᮦᮃ ᮞᮀᮌᮩᮞ᮪ᮔ ᮒᮛᮕ᮪ᮒᮤ, ᮞᮨᮙ᮪ᮕᮢᮥᮀ ᮘᮆ ᮜᮚᮁ.

ᮘᮛᮀ ᮓᮒᮀ ᮊ ᮘᮞᮤᮞᮤᮁ, ᮊᮤ ᮘᮨᮔᮨᮁ ᮊᮞᮙ᮪ᮕᮊ᮪ ᮊᮩᮁ ᮍᮥᮞᮩᮕ᮪ ᮊᮦᮔᮦᮂ, ᮊᮝᮔ᮪ᮒᮥ ᮌᮝᮦᮔ ᮠᮨᮔ᮪ᮒᮩ ᮃᮚ ᮓᮩᮄ ᮞᮅᮙᮥᮁ-ᮅᮙᮥᮁ ᮍᮔ᮪ ᮍᮥᮞᮩᮕ᮪ ᮘᮆ.

ᮔᮀᮊᮧᮓ ᮑᮅᮁ ᮊ ᮙᮒᮢᮧᮞ᮪-ᮙᮒᮢᮧᮞ᮪ᮔ: “ᮃᮚᮩᮔ ᮄᮉ ᮕᮀᮍᮥᮔ᮪ᮏᮜ᮪ᮊᮩᮔ᮪ ᮎᮛᮀᮊ ᮊ ᮞᮤᮞᮤ ᮘᮞᮤᮞᮤᮁ ᮘᮤᮊᮩᮔ᮪ ᮊ ᮊᮤ ᮘᮨᮔᮨᮁ”.

ᮞᮈᮀᮌᮩᮞ᮪ᮔ ᮎᮛᮀᮊ ᮓᮤᮊᮥᮔ᮪ᮏᮜ᮪ ᮊᮥ ᮞᮓᮚᮔ, ᮔᮀᮊᮧᮓ ᮙᮤᮝᮛᮀ ᮓᮩᮄ ᮊ ᮙᮒᮢᮧᮞ᮪-ᮙᮒᮢᮧᮞ᮪ᮔ ᮞᮅᮁᮔ: ᮄᮉ ᮞᮦᮛᮦᮔ᮪ᮊᮩᮔ᮪ ᮊ ᮊᮤ ᮘᮨᮔᮨᮁ ᮓᮤᮔ ᮞᮤᮞᮤ ᮘᮞᮤᮞᮤᮁ, ᮒᮥᮂ! ᮌᮩᮔᮤᮀ, ᮃᮔᮥ ᮊᮩᮁ ᮍᮥᮞᮩᮕ᮪, ᮘᮦᮏᮊᮩᮔ᮪ ᮕᮕᮛᮤᮔ᮪ ᮒᮤ ᮊᮀᮏᮨᮀ ᮛᮏ”.

ᮒᮥᮜᮥᮚ᮪ ᮊᮥ ᮙᮒᮢᮧᮞ᮪ᮔ ᮎᮛᮀᮊ ᮒᮦᮂ ᮓᮤᮞᮦᮛᮦᮔ᮪ᮊᮩᮔ᮪ ᮊ ᮊᮤ ᮘᮨᮔᮨᮁ, ᮘᮛᮤ ᮓᮤᮘᮨᮏᮊᮩᮔ᮪ ᮕᮕᮛᮤᮔ᮪ ᮛᮏ.

ᮎᮦᮊ᮪ ᮊᮤ ᮘᮨᮔᮨᮁ: “ᮔᮥᮠᮥᮔ᮪”.

ᮒᮩ ᮜᮤᮜ ᮓᮒᮀ ᮕᮙᮏᮤᮊᮔᮔ ᮙᮝ ᮘᮊᮒᮥᮜ᮪.

ᮎᮦᮊ᮪ ᮊᮤ ᮘᮨᮔᮨᮁ: “ᮄᮉ ᮏᮩᮉᮀ ᮊᮥ ᮙᮔᮦᮂ, ᮕᮕᮛᮤᮔ᮪ ᮊᮀᮏᮨᮀ ᮛᮏ ᮒᮤ ᮃᮜᮞ᮪ ᮕᮩᮔ᮪ᮒᮞ᮪, ᮌᮩᮝᮒ᮪ ᮊᮥ ᮙᮔᮦᮂ ᮊᮥᮔ᮪ᮏᮜ᮪ ᮊ ᮄᮙᮂ”.

ᮌᮔ᮪ᮎᮀᮔ ᮓᮤᮘᮝᮃᮔ᮪ ᮊ ᮄᮙᮂᮔ.

ᮘᮛᮀ ᮓᮒᮀ ᮊ ᮄᮙᮂᮔ, ᮕᮦᮊ᮪ ᮓᮤᮘᮥᮊ. ᮃᮒᮧᮂ ᮊᮤ ᮘᮨᮔᮨᮁ ᮊᮌᮦᮒᮩᮔ᮪ ᮊᮘᮤᮔ-ᮘᮤᮔ, ᮔᮦᮔ᮪ᮏᮧ ᮓᮥᮄᮒ᮪, ᮕᮕᮊᮦᮃᮔ᮪ ᮃᮛᮧᮔ᮪ ᮞᮊᮤᮒᮥ ᮜᮧᮘᮔ, ᮞᮁᮒ ᮓᮤᮕᮧᮂᮕᮢᮧᮜ᮪-ᮕᮧᮂᮕᮢᮧᮜ᮪ ᮕᮧᮊ᮪ᮔ: “ᮔᮠ, ᮊᮀᮏᮨᮀ ᮛᮏ ᮕᮧᮕᮧᮠᮧᮃᮔ᮪ ᮒᮩᮄᮀ ᮙᮕᮛᮤᮔ᮪ ᮒᮦᮂ”.

ᮝᮀᮞᮥᮜ᮪ ᮕᮙᮏᮤᮊᮔᮔ: “ᮌᮩᮞ᮪ ᮘᮌ᮪ᮏ ᮅᮛᮀ, ᮙᮩᮛᮩᮔ᮪ ᮠᮝᮒᮧᮞᮩᮔ᮪ ᮛᮏ ᮒᮦᮂ ᮊ ᮔᮥ ᮙᮜᮛᮒ᮪”.

ᮒᮤ ᮓᮤᮑ ᮊᮤ ᮘᮨᮔᮨᮁ ᮒᮥᮜᮥᮚ᮪ ᮙᮩᮜᮤ ᮄᮙᮂ ᮃᮔᮥ ᮌᮨᮓᮦ, ᮙᮩᮜᮤ ᮊᮥᮓ, ᮞᮕᮤ, ᮙᮥᮔ᮪ᮓᮤᮀ, ᮏᮩᮀ ᮞᮌᮜ ᮄᮍᮧᮔ᮪-ᮄᮍᮧᮔ᮪.

ᮃᮒᮥᮂ ᮞᮊᮥᮁ ᮃᮔᮥ ᮓᮩᮊᮩᮒ᮪ ᮊ ᮄᮙᮂᮔ ᮊᮤ ᮘᮨᮔᮨᮁ ᮕᮓ ᮊᮌᮦᮒ᮪, ᮛᮦᮂ ᮊᮤ ᮘᮨᮔᮨᮁ ᮏᮓᮤ ᮘᮩᮀᮠᮁ ᮍᮓᮊ᮪-ᮍᮓᮊ᮪.

ᮒᮤ ᮓᮤᮑ ᮊᮆᮙ᮪ᮕᮦᮁ-ᮆᮙ᮪ᮕᮦᮁ ᮊ ᮛᮏ, ᮚᮦᮔ᮪ ᮊᮤ ᮘᮨᮔᮨᮁ ᮏᮓᮤ ᮞᮥᮌᮤᮂ.

ᮒᮥᮜᮥᮚ᮪ ᮊᮥ ᮛᮏ ᮓᮤᮕᮤᮝᮛᮀ ᮓᮤᮞᮅᮁ.

ᮒᮩ ᮜᮤᮜ ᮊᮤ ᮘᮨᮔᮨᮁ ᮓᮧᮀᮊᮕ᮪ ᮊᮕᮚᮥᮔᮩᮔ᮪ ᮛᮏ, ᮒᮥᮜᮥᮚ᮪ ᮓᮤᮕᮛᮤᮊ᮪ᮞ ᮊᮥ ᮛᮏ: “ᮙᮔᮦᮂ ᮘᮧᮌ ᮘᮛᮀ ᮒᮤ ᮙᮔ, ᮔᮥ ᮙᮒᮊ᮪ ᮘᮩᮀᮠᮁ ᮙᮕᮊᮔ᮪ ᮊ ᮊᮙᮤ?”

ᮕᮤᮅᮔ᮪ᮏᮥᮊ᮪ ᮊᮤ ᮘᮨᮔᮨᮁ: “ᮞᮥᮙᮥᮠᮥᮔ᮪, ᮕᮕᮛᮤᮔ᮪ ᮒᮤ ᮊᮀᮏᮨᮀ ᮛᮏ ᮃᮜᮞ᮪ ᮕᮩᮔ᮪ᮒᮞ᮪”.

ᮞᮅᮁ ᮛᮏ ᮊ ᮊᮤ ᮘᮨᮔᮨᮁ: “ᮘᮨᮔᮨᮁ, ᮊᮙᮤ ᮘᮛᮦᮒᮧ ᮌᮩᮞ᮪ ᮔᮤᮒᮂ ᮘᮜᮔ᮪ᮏ ᮊ ᮃᮜᮞ᮪ ᮕᮩᮔ᮪ᮒᮞ᮪, ᮒᮕᮤ ᮒᮤᮒᮠᮔ᮪ ᮊᮙᮤ ᮒᮤᮒᮩᮜᮩᮙ᮪ ᮞᮁᮒ ᮜᮕᮥᮁ ᮏᮛᮥᮙ᮪ ᮞᮊᮨᮒᮤ ᮜᮧᮘᮔ. ᮃᮚᮩᮔ ᮙᮔᮦᮂ ᮊᮥ ᮊᮙᮤ ᮓᮤᮕᮨᮛᮤᮂ ᮕᮒᮤ ᮊᮥᮓᮥ ᮙᮩᮔᮀᮊᮩᮔ᮪ ᮓᮩᮄ ᮊᮘᮦᮂ, ᮜᮙᮥᮔ᮪ ᮙᮔᮦᮂ ᮒᮩ ᮞᮀᮌᮥᮕ᮪, ᮒᮀᮒᮥ ᮓᮤᮒᮩᮊ᮪ᮒᮩᮊ᮪ ᮘᮩᮠᮩᮀ. ᮕᮦᮊ᮪, ᮃᮚᮩᮔ ᮊᮥ ᮙᮔᮦᮂ ᮌᮩᮛ ᮒᮦᮃᮀ”.

ᮌᮩᮞ᮪ ᮊᮤᮒᮥ, ᮊᮤ ᮘᮨᮔᮨᮁ ᮜᮩᮙ᮪ᮕᮀ ᮊ ᮞᮤᮞᮤ ᮘᮞᮤᮞᮤᮁ, ᮎᮩᮛᮤᮊ᮪ ᮓᮤᮔ ᮕᮛᮔ᮪ᮒᮤᮔ ᮍᮥᮞᮩᮕ᮪.

ᮊᮒᮤᮍᮜᮤ ᮊᮥ ᮛᮒᮥ ᮜᮅᮊ᮪: “ᮊᮥ ᮔᮇᮔ᮪”, ᮎᮦᮊ᮪ ᮛᮒᮥ ᮜᮅᮊ᮪, “ᮊᮤ ᮘᮨᮔᮨᮁ ᮎᮩᮛᮤᮊ᮪ ᮓᮤᮔ ᮞᮤᮞᮤ ᮘᮞᮤᮞᮤᮁ?”

ᮝᮀᮞᮥᮜ᮪ ᮊᮤ ᮘᮨᮔᮨᮁ: “ᮊᮅᮜ ᮓᮤᮕᮤᮝᮛᮀ ᮊᮥ ᮛᮒᮥ ᮊᮥᮓᮥ ᮘᮤᮞ ᮑᮧᮊᮧᮒᮔ᮪ ᮓᮤᮔ ᮏᮨᮛᮧ ᮜᮅᮒ᮪ ᮏᮛᮥᮙ᮪ ᮞᮊᮨᮒᮤ ᮜᮧᮘᮔ”.

ᮎᮦᮊ᮪ ᮛᮒᮥ ᮜᮅᮊ᮪: “ᮙᮧᮔ᮪ᮒᮧᮀ ᮞᮜᮨᮙ᮪ᮕᮀ, ᮊᮤ ᮘᮨᮔᮨᮁ, ᮓᮌᮧᮃᮔ᮪ ᮘᮆ ᮓᮤᮓᮤᮉ, ᮙᮧᮔ᮪ᮒᮧᮀ ᮎᮩᮛᮤᮊ᮪”.

ᮒᮤ ᮓᮤᮑ ᮛᮒᮥ ᮜᮅᮊ᮪ ᮑᮅᮁ ᮊ ᮘᮜᮓ᮪-ᮘᮜᮓ᮪ᮔ ᮞᮉᮞᮤᮔ ᮞᮌᮛ.

ᮌᮔ᮪ᮎᮀᮔ, ᮌᮩᮞ᮪ ᮊᮥᮙ᮪ᮕᮥᮜ᮪ ᮊᮘᮦᮂ ᮓᮤ ᮞᮌᮛ. ᮞᮅᮁ ᮛᮒᮥ ᮜᮅᮊ᮪: “ᮘᮛᮥᮓᮊ᮪, ᮃᮚᮩᮔ ᮊᮥᮓᮥ ᮙᮥᮜᮀ ᮒᮛᮤᮙ ᮊ ᮊᮤ ᮘᮨᮔᮨᮁ, ᮞᮘᮘ᮪ ᮅᮛᮀ ᮓᮤᮕᮛᮘᮔ᮪ ᮊᮥ ᮊᮤ ᮘᮨᮔᮨᮁ ᮞᮅᮙᮥᮁ-ᮅᮙᮥᮁ. ᮛᮦᮂ ᮊᮤ ᮘᮨᮔᮨᮁ ᮘᮧᮌ ᮊᮞᮥᮞᮂ ᮓᮤᮕᮨᮛᮤᮂ ᮕᮒᮤ ᮊᮥ ᮛᮏ, ᮊᮥᮓᮥ ᮑᮧᮊᮧᮒᮔ᮪ ᮏᮛᮥᮙ᮪ ᮓᮤᮔ ᮏᮨᮛᮧ ᮜᮅᮒ᮪; ᮃᮚᮩᮔ ᮊᮥ ᮙᮔᮦᮂ ᮊᮥᮓᮥ ᮓᮤᮕᮀᮑᮛᮧᮊᮧᮒᮔ᮪ᮊᮩᮔ᮪”.

ᮌᮔ᮪ᮎᮀᮔ, ᮜᮅᮊ᮪ ᮃᮔᮥ ᮞᮊᮤᮒᮥ ᮛᮦᮃᮔ ᮞᮀᮌᮥᮕ᮪ ᮊᮘᮦᮂ.

ᮕᮦᮊ᮪ ᮕᮓ ᮍᮛᮦᮌᮦᮜᮔ᮪ ᮏᮛᮥᮙ᮪, ᮜᮅᮊ᮪ ᮃᮔᮥ ᮞᮊᮤᮒᮥ ᮛᮦᮃᮔ.ᮒᮤᮔ ᮘᮝᮔᮤᮀ ᮊᮥ ᮛᮦᮃ ᮜᮅᮊ᮪ ᮘᮒᮔ᮪ ᮏᮛᮥᮙ᮪, ᮠᮤᮏᮤ ᮏᮛᮥᮙ᮪ ᮃᮚ ᮃᮔᮥ ᮓᮤᮌᮦᮌᮦᮜ᮪ ᮊᮥ ᮒᮤᮜᮥᮃᮔ᮪, ᮕᮓ ᮓᮤᮃᮛᮥᮒᮂᮊᮩᮔ᮪ ᮓᮤᮠᮛᮩᮕᮩᮔ᮪ ᮊᮤ ᮘᮨᮔᮨᮁ.

ᮓᮤᮘᮤᮜᮀ ᮊᮥ ᮊᮤ ᮘᮨᮔᮨᮁ ᮘᮛᮤ ᮎᮩᮛᮤᮊ᮪ ᮓᮤᮔ ᮞᮤᮞᮤ ᮎᮄ.

ᮌᮩᮞ᮪ ᮃᮚ ᮊᮘᮦᮂ, ᮍᮧᮙᮧᮀ ᮜᮅᮊ᮪ ᮊ ᮊᮤ ᮘᮨᮔᮨᮁ: “ᮏᮤᮌ᮪, ᮞᮀᮌᮊᮩᮔ᮪ ᮊ ᮛᮏ, ᮓ ᮌᮩᮞ᮪ ᮏᮨᮏᮨᮌ᮪, ᮃᮚᮩᮔ ᮙᮂ, ᮌᮩᮛ ᮘᮝ ᮊ ᮛᮏ”.

ᮌᮔ᮪ᮎᮀᮔ ᮊᮤ ᮘᮨᮔᮨᮁ ᮄᮔ᮪ᮓᮤᮒ᮪, ᮞᮨᮏ ᮑᮀᮌᮊᮩᮔ᮪ ᮏᮛᮥᮙ᮪ ᮊ ᮛᮏ, ᮓᮤᮞᮧᮛᮦᮔ᮪ᮓᮀ.

ᮘᮛᮀ ᮓᮧᮀᮊᮕ᮪ ᮊ ᮛᮏ, ᮕᮧᮊ᮪ ᮅᮔ᮪ᮏᮥᮊᮔ᮪: “ᮄᮉ, ᮏᮤᮞᮤᮙ᮪ ᮃᮘ᮪ᮓᮤ ᮞᮥᮙᮨᮏ ᮑᮀᮌᮊᮩᮔ᮪ ᮏᮛᮥᮙ᮪ ᮒᮦᮃ”.

ᮌᮩᮞ᮪ ᮊᮤᮒᮥ, ᮛᮏ ᮑᮔ᮪ᮓᮊ᮪ ᮆᮒ ᮏᮛᮥᮙ᮪.

ᮒᮤ ᮓᮤᮑ ᮛᮏ ᮑᮅᮁ ᮓᮩᮄ ᮊ ᮊᮤ ᮘᮨᮔᮨᮁ ᮞᮅᮁᮔ: “ᮃᮚᮩᮔ ᮊᮤ ᮘᮨᮔᮨᮁ, ᮙᮔᮦᮂ ᮅᮜᮂ ᮍᮩᮔᮂ-ᮍᮩᮔᮂ. ᮎᮧᮘ, ᮊᮙᮤ ᮕᮀᮑᮧᮊᮧᮒ᮪ᮊᮩᮔ᮪ ᮓᮩᮄ ᮕᮨᮓᮀ ᮝᮥᮜᮥᮀ ᮓᮤ ᮓᮞᮁ ᮜᮅᮒ᮪”.

ᮕᮤᮅᮔ᮪ᮏᮥᮊ᮪ ᮊᮤ ᮘᮨᮔᮨᮁ: “ᮊᮀᮏᮨᮀ ᮛᮏ, ᮔᮠ ᮊ ᮏᮤᮞᮤᮙ᮪ ᮃᮘ᮪ᮓᮤ ᮒᮦᮂ ᮘᮨᮒ᮪ ᮊᮎᮤᮓ-ᮊᮎᮤᮓ ᮒᮩᮄᮀ ᮙᮤᮝᮛᮀ ᮊ ᮔᮥ ᮒᮩ ᮕᮔ᮪ᮒᮨᮞ᮪, ᮒᮩ ᮕᮨᮁᮔᮂ, ᮒᮩ ᮕᮒᮥᮒ᮪, ᮃᮚ ᮕᮨᮓᮀ ᮓᮤᮔ ᮓᮞᮁ ᮜᮅᮒ᮪, ᮊᮥᮓᮥ ᮓᮤᮘᮔ᮪ᮒᮥᮔ᮪ ᮊᮥ ᮏᮤᮞᮤᮙ᮪ ᮃᮘ᮪ᮓᮤ, ᮜᮀᮊᮥᮀ ᮞᮆ ᮏᮤᮞᮤᮙ᮪ ᮘᮓᮤ ᮕᮆᮠᮔ᮪ ᮘᮆ ᮏᮩᮀ ᮓᮤᮊᮄᮔᮚ ᮙᮂ”.

ᮛᮏ ᮑᮦᮔ᮪ᮒᮧᮁ: “ᮔᮠ, ᮞᮤᮃ ᮠᮔ᮪ᮒᮩ ᮍᮝᮥᮜ ᮊ ᮃᮄᮀ, ᮒᮩ ᮛᮥᮙᮞ ᮞᮤᮃ ᮎᮤᮎᮤᮀ ᮓᮤ ᮒᮔᮩᮂ ᮃᮄᮀ? ᮌᮩᮛ ᮏᮧᮁ ᮙᮔ᮪ᮒᮧᮌ᮪, ᮌᮩᮝᮒ᮪ ᮄᮔ᮪ᮓᮤᮒ᮪, ᮙᮧᮔ᮪ᮒᮧᮀ ᮜᮧᮘ ᮘᮎᮧᮒ᮪; ᮃᮄᮀ ᮙᮧ ᮙᮩᮔ᮪ᮎᮤᮒ᮪ ᮏᮜ᮪ᮙ ᮒᮩ ᮕᮥᮌᮥᮂ”.

ᮕᮤᮅᮔ᮪ᮏᮥᮊ᮪ ᮊᮤ ᮘᮨᮔᮨᮁ: “ᮑᮥᮠᮥᮔ᮪ᮊᮩᮔ᮪ ᮕᮙᮤᮒ᮪ ᮝᮀᮞᮥᮜ᮪”; ᮒᮤ ᮓᮤᮑ ᮄᮔ᮪ᮓᮤᮒ᮪ ᮘᮛᮥ ᮑᮥᮞᮥᮒᮔ᮪ ᮎᮤᮕᮔᮧᮔ᮪.

ᮘᮛᮀ ᮓᮒᮀ ᮊ ᮄᮙᮂᮔ, ᮑᮛᮤᮒᮊᮩᮔ᮪ ᮕᮤᮝᮛᮀᮔ ᮛᮏ ᮠᮨᮔ᮪ᮒᮩ ᮃᮚ ᮔᮥ ᮊᮜᮤᮝᮒ᮪ ᮊ ᮕᮙᮏᮤᮊᮔᮔ ᮘᮛᮤ ᮎᮩᮛᮤᮊ᮪.

ᮎᮦᮊ᮪ ᮕᮙᮏᮤᮃᮊᮔᮔ: “ᮆᮂ, ᮊᮀ ᮘᮨᮔᮨᮁ, ᮕᮨᮔ᮪ᮓᮦᮊ᮪ᮔ ᮃᮛᮤ ᮎᮛ ᮊᮥᮛᮤᮀ ᮙᮂ, ᮙᮧ ᮓᮒᮀ ᮊ ᮠᮨᮔ᮪ᮒᮩ ᮘᮦᮜ ᮕᮒᮤ, ᮃᮊᮀ ᮠᮤᮜᮀ, ᮊᮥᮛᮤᮀ ᮠᮤᮜᮀ, ᮃᮊᮀ ᮠᮤᮛᮥᮕ᮪, ᮊᮥᮛᮤᮀ ᮠᮤᮛᮥᮕ᮪, ᮃᮀᮌᮥᮁ, ᮞᮥᮙᮀᮌ, ᮃᮚᮩᮔ ᮙᮂ ᮅᮛᮀ ᮙᮤᮎᮩᮔ᮪ ᮘᮆ ᮊ ᮜᮅᮒ᮪”.

ᮆᮒ ᮊᮤ ᮘᮨᮔᮨᮁ, ᮞᮀᮌ᮪ᮌᮩᮞ᮪ᮔ ᮘᮩᮀᮠᮁ, ᮘᮧᮌ ᮛᮠᮚᮒ᮪ ᮓᮥᮃ ᮕᮥᮜᮥᮂ, ᮏᮓᮤᮔ ᮙᮔᮦᮂᮔ ᮘᮧᮌ ᮊᮞᮥᮞᮠᮔ᮪, ᮆᮒ ᮃᮔᮥ ᮓᮥᮃ ᮕᮥᮜᮥᮂ ᮏᮜ᮪ᮙ ᮒᮦᮃ, ᮊᮘᮦᮂ ᮕᮓ ᮔᮛᮨᮕᮥᮍᮔ᮪, ᮞᮁᮒ ᮙᮛᮤᮜᮥ ᮞᮥᮞᮂ ᮊ ᮊᮤ ᮘᮨᮔᮨᮁ.

ᮌᮔ᮪ᮎᮀᮔ ᮒᮥᮜᮥᮚ᮪ ᮘᮆ ᮊᮤ ᮘᮨᮔᮨᮁ ᮜᮩᮙ᮪ᮕᮀ ᮏᮩᮀ ᮕᮙᮏᮤᮊᮔᮔ.

ᮒᮩ ᮜᮤᮜ, ᮊᮤ ᮘᮨᮔᮨᮁ ᮏᮩᮀ ᮕᮙᮏᮤᮊᮔᮔ ᮓᮒᮀ ᮊ ᮞᮤᮞᮤ ᮞᮌᮛ; ᮕᮓ ᮎᮩᮛᮤᮊ᮪ ᮒᮤᮀᮞᮜᮨᮌᮢᮥᮊ᮪.

ᮘᮛᮀ ᮌᮩᮞ᮪ ᮙᮩᮔᮀ ᮒᮥᮏᮥᮂ ᮕᮧᮆ ᮒᮥᮏᮥᮂ ᮕᮩᮒᮤᮀ ᮓᮤ ᮞᮤᮞᮤ ᮞᮌᮛ, ᮊᮒᮤᮍᮜᮤ ᮓᮩᮄ ᮊᮥ ᮛᮒᮥ ᮜᮅᮊ᮪.

ᮕᮧᮊ᮪ᮔ ᮙᮛᮤᮊ᮪ᮞᮊᮩᮔ᮪ ᮊᮤ ᮘᮨᮔᮨᮁ: “ᮊᮥ ᮔᮇᮔ᮪ ᮙᮔᮦᮂ, ᮊᮤ ᮘᮨᮔᮨᮁ, ᮃᮔᮥ ᮙᮒᮊ᮪ ᮎᮩᮛᮤᮊ᮪ ᮏᮩᮀ ᮕᮙᮏᮤᮊᮔ᮪ ᮞᮨᮙᮥ ᮃᮔᮥ ᮑᮨᮛᮤ-ᮑᮨᮛᮤ ᮒᮩᮄᮀ, ᮔᮇᮔ᮪ ᮓᮩᮄ ᮊᮞᮥᮞᮂ ᮙᮔᮦᮂ ᮒᮦᮂ?”

ᮊᮤ ᮘᮨᮔᮨᮁ ᮔᮌᮝᮀᮞᮥᮜ᮪: “ᮊᮅᮜ ᮃᮚ ᮊᮞᮥᮞᮂ; ᮃᮔᮥ ᮙᮨᮒᮜ᮪ ᮎᮩᮛᮤᮊ᮪ ᮒᮦᮂ, ᮓᮤᮕᮤᮝᮛᮀ ᮊᮥ ᮛᮏ ᮑᮧᮊᮧᮒ᮪ ᮕᮨᮓᮀ ᮓᮤᮔ ᮓᮞᮁ ᮜᮅᮒ᮪. ᮆᮒ ᮕᮨᮓᮀ ᮓᮤᮞᮨᮘᮒ᮪ᮔ ᮕᮨᮓᮀ ᮝᮥᮜᮥᮀ, ᮊᮤ ᮘᮥᮠᮚ ᮃᮔᮥ ᮘᮧᮌ”.

ᮎᮦᮊ᮪ ᮛᮒᮥ ᮜᮅᮊ᮪: “ᮙᮧᮔ᮪ᮒᮧᮀ ᮓᮤᮕᮊᮦ ᮞᮥᮞᮂ. ᮕᮦᮊ᮪ ᮘᮆ ᮃᮚᮩᮔ, ᮙᮂ ᮌᮩᮛ ᮒᮥᮙ᮪ᮕᮊ᮪ ᮊᮔ ᮠᮥᮜᮥ ᮘᮛᮥᮓᮊ᮪”.

ᮒᮤ ᮓᮤᮑ ᮠᮥᮜᮥ ᮜᮅᮊ᮪ ᮕᮓ ᮛᮧᮀᮠᮧᮊ᮪, ᮛᮦᮊ᮪ ᮔᮙ᮪ᮕᮔᮔ᮪ ᮊᮤ ᮘᮨᮔᮨᮁ.

ᮊᮤ ᮘᮨᮔᮨᮁ ᮌᮩᮞ᮪ ᮕᮞᮢᮂ.

ᮎ᮪ᮜᮧᮊ᮪ ᮊᮤ ᮘᮨᮔᮨᮁ ᮔᮥᮙ᮪ᮕᮊᮔ᮪ ᮠᮥᮜᮥ ᮜᮅᮊ᮪ ᮒᮩ ᮏᮩᮀ ᮕᮙᮏᮤᮊᮔᮔ.

ᮒᮥᮜᮥᮚ᮪ ᮊᮥ ᮜᮅᮊ᮪ ᮓᮤᮘᮝ ᮊ ᮓᮞᮁ ᮜᮅᮒ᮪.

ᮘᮛᮀ ᮔᮨᮕᮤ ᮊ ᮘᮥᮠᮚ, ᮔᮑ ᮛᮒᮥ ᮜᮅᮊ᮪. ᮎᮦᮊ᮪ ᮘᮥᮠᮚ: “ᮔᮠ ᮛᮒᮥ ᮜᮅᮊ᮪, ᮘᮨᮒ᮪ ᮙᮝ ᮙᮔᮥᮞ”.

ᮎᮦᮊ᮪ ᮛᮒᮥ ᮜᮅᮊ᮪: “ᮑᮆᮒ ᮕᮥᮌᮥᮂ ᮄᮉ ᮒᮦᮂ ᮓᮤᮕᮤᮝᮛᮀ ᮊᮥ ᮛᮏ ᮑᮧᮊᮧᮒ᮪ ᮕᮨᮓᮀ ᮝᮥᮜᮥᮀ”.

ᮘᮥᮠᮚ ᮔᮩᮒᮩᮕ᮪ ᮘᮛᮤ ᮍᮧᮙᮧᮀ, ᮕᮧᮊ᮪ᮔ: “ᮆᮒ ᮙᮔᮥᮞ ᮒᮀᮒᮥ ᮓᮤᮘᮤᮔᮞᮊᮉᮔ᮪ ᮊᮥ ᮛᮏ, ᮒᮕᮤ ᮙᮧᮔ᮪ᮒᮧᮀ ᮞᮥᮞᮂ ᮙᮔᮦᮂ ᮒᮦᮂ. ᮠᮨᮂ ᮘᮆ ᮄᮉ ᮕᮨᮓᮀ ᮒᮦᮂ.ᮞᮘᮘ᮪ ᮊᮙᮤ ᮊᮛᮥᮑ ᮊ ᮙᮔᮦᮂ, ᮜᮄᮔ᮪ ᮊᮛᮥᮑ ᮊ ᮛᮏ. ᮏᮩᮀ ᮊᮙᮤ ᮒᮜᮒᮂ, ᮙᮀᮊᮦ ᮓᮤᮔ ᮕᮧᮆ ᮞᮜᮞ, ᮛᮏ ᮊᮥᮓᮥ ᮜᮥᮀᮞᮥᮁ ᮊᮓᮤᮉ, ᮊᮥ ᮊᮙᮤ ᮏᮩᮀ ᮊᮥ ᮞᮊᮘᮦᮂ ᮘᮛᮥᮓᮊ᮪ ᮒᮀᮒᮥ ᮓᮤᮕᮕᮌ᮪ ᮞᮁᮒ ᮙᮛᮛᮤᮓᮀ. ᮃᮚᮩᮔ ᮙᮂ, ᮏᮤᮌ᮪ ᮘᮆ, ᮙᮔᮦᮂ ᮌᮩᮛ ᮙᮥᮜᮀ”.

ᮌᮔ᮪ᮎᮀᮔ, ᮊᮤ ᮘᮨᮔᮨᮁ ᮒᮥᮜᮥᮚ᮪ ᮘᮆ ᮄᮔ᮪ᮓᮤᮒ᮪; ᮛᮛᮞᮃᮔᮔ ᮓᮤ ᮏᮜᮔ᮪ ᮌᮨᮓᮦ ᮘᮆ, ᮠᮨᮔ᮪ᮒᮩ ᮃᮞ ᮘᮤᮏᮤᮜ᮪ ᮒᮤᮔ ᮏᮨᮛᮧ ᮎᮄ.

ᮘᮛᮀ ᮓᮧᮀᮊᮕ᮪ ᮊ ᮞᮤᮞᮤ, ᮕᮙᮏᮤᮊᮔᮔ ᮉᮊᮩᮁ ᮎᮩᮛᮤᮊ᮪ ᮊᮦᮔᮦᮂ ᮘᮆ.

ᮒᮥᮜᮥᮚ᮪ ᮍᮧᮙᮧᮀ ᮊᮤ ᮘᮨᮔᮨᮁ, ᮕᮧᮊ᮪ᮔ: “ᮙᮧᮔ᮪ᮒᮧᮀ ᮓᮤᮕᮊᮦ ᮎᮩᮛᮤᮊ᮪ ᮃᮚᮩᮔ ᮙᮂ, ᮕᮨᮓᮀ ᮊᮥ ᮃᮊᮀ ᮌᮩᮞ᮪ ᮓᮤᮞᮧᮛᮦᮔ᮪ᮓᮀ. ᮠᮚᮥ! ᮃᮀᮌᮥᮁ ᮅᮛᮀ ᮘᮜᮤᮊ᮪”.

ᮘᮛᮀ ᮓᮧᮀᮊᮕ᮪ ᮊ ᮄᮙᮂᮔ ᮍᮔ᮪ ᮉᮛᮩᮔ᮪ ᮞᮊᮩᮓᮩᮀ.

ᮒᮥᮜᮥᮚ᮪ ᮘᮆ ᮍᮓᮩᮠᮩᮞ᮪ ᮓᮩᮄ ᮊ ᮛᮏ, ᮞᮨᮏ ᮑᮀᮌᮊᮩᮔ᮪ ᮆᮒ ᮕᮨᮓᮀ ᮝᮥᮜᮥᮀ ᮏᮩᮀ ᮛᮦᮊ᮪ ᮍᮥᮔ᮪ᮏᮥᮊ᮪ᮊᮩᮔ᮪ ᮒᮜᮒᮂ ᮛᮒᮥ ᮘᮥᮠᮚ ᮒᮦᮃ.

ᮞᮈᮀᮌᮩᮞ᮪ ᮓᮧᮀᮊᮕ᮪ ᮊ ᮕᮚᮥᮔᮩᮔ᮪ ᮛᮏ, ᮆᮒ ᮕᮨᮓᮀ ᮒᮥᮜᮥᮚ᮪ ᮘᮆ ᮓᮤᮞᮀᮌᮊᮩᮔ᮪ ᮏᮩᮀ ᮒᮜᮒᮂ ᮛᮒᮥ ᮘᮥᮠᮚ ᮆᮒ ᮓᮤᮅᮔ᮪ᮏᮥᮊ᮪ᮊᮩᮔ᮪.

ᮃᮒᮥᮂ ᮛᮏ ᮒᮩ ᮊᮤᮔ᮪ᮒᮨᮔ᮪ ᮘᮆ ᮘᮥᮍᮠᮩᮔᮔ. ᮌᮥᮙᮥᮏᮨᮀ ᮍᮌᮊ᮪ᮌᮊ᮪ ᮒᮤᮔ ᮘᮝᮔᮤᮀ ᮞᮥᮊ. ᮘᮛᮤ ᮒᮥᮜᮥᮚ᮪ ᮙᮤᮝᮛᮀ ᮘᮛᮀ ᮓᮠᮁ ᮊ ᮊᮤ ᮘᮨᮔᮨᮁ, ᮛᮏ ᮍᮜᮠᮤᮁ, ᮞᮅᮁᮔ: “ᮈᮀᮊᮦ, ᮓᮤ ᮙᮔ? ᮊᮙᮤ ᮛᮦᮊ᮪ ᮄᮔ᮪ᮓᮤᮒ᮪, ᮊᮥ ᮙᮔᮦᮂ ᮊᮥᮓᮥ ᮏᮏᮕ᮪ᮊᮩᮔ᮪.

ᮎᮦᮊ᮪ ᮊᮤ ᮘᮨᮔᮨᮁ: “ᮅᮔ᮪ᮏᮥᮊ᮪ ᮞᮥᮙᮀᮌ”.

ᮒᮥᮜᮥᮚ᮪ ᮊᮤ ᮘᮨᮔᮨᮁ ᮙᮥᮜᮀ.

ᮘᮛᮀ ᮓᮧᮀᮊᮕ᮪ ᮊ ᮕᮧᮆ ᮞᮜᮞ ᮒᮦᮃ, ᮛᮏ ᮌᮩᮞ᮪ ᮍᮀᮌᮧ-ᮍᮀᮌᮧ, ᮊᮤ ᮘᮨᮔᮨᮁ ᮌᮩᮞ᮪ ᮃᮚ ᮓᮤᮔ ᮞᮤᮞᮤ ᮘᮞᮤᮞᮤᮁ.

ᮛᮏ ᮙᮛᮦᮔ᮪ᮒᮂ ᮊ ᮛᮦᮔ᮪ᮎᮀᮔ ᮏᮩᮀ ᮊ ᮞᮓᮚᮔ ᮕᮒᮤᮂ, ᮕᮧᮀᮌᮝ, ᮞᮅᮁᮔ: “ᮊᮙᮤ ᮃᮚᮩᮔ ᮊᮥᮓᮥ ᮄᮛᮤᮀ ᮊ ᮞᮤᮞᮤ ᮜᮅᮒ᮪, ᮞᮘᮘ᮪ ᮊᮙᮤ ᮓᮤᮒᮜᮒᮂᮊᮩᮔ᮪ ᮊᮥ ᮛᮒᮥ ᮘᮥᮠᮚ, ᮘᮞ ᮊᮤ ᮘᮨᮔᮨᮁ, ᮑᮧᮊᮧᮒ᮪ ᮕᮨᮓᮀ”.

ᮆᮀᮌᮜ᮪ᮔ ᮛᮏ ᮏᮨᮀᮊᮁ, ᮓᮤᮄᮛᮤᮀ ᮊᮥ ᮞᮓᮚᮔ.

ᮊᮤ ᮘᮨᮔᮨᮁ ᮌᮩᮞ᮪ ᮃᮚ ᮓᮤᮔ ᮞᮤᮞᮤ ᮜᮅᮒ᮪ ᮘᮛᮤ ᮑᮧᮛᮦᮔ᮪ᮓᮀ ᮕᮨᮓᮀ ᮝᮥᮜᮥᮀ ᮒᮦᮃ.

ᮓᮧᮀᮊᮕ᮪ ᮊ ᮞᮤᮞᮤ ᮜᮅᮒ᮪, ᮊᮒᮤᮍᮜᮤ ᮛᮒᮥ ᮘᮥᮠᮚ ᮊᮥ ᮊᮤ ᮘᮨᮔᮨᮁ ᮏᮩᮀ ᮘᮜᮓ᮪ᮔ ᮜᮅᮊ᮪ ᮛᮧᮀᮠᮕ᮪: ᮒᮚ ᮕᮤᮞᮔ᮪ ᮠᮩᮜᮩᮒ᮪ᮔ.

ᮘᮛᮀ ᮛᮏ ᮌᮩᮞ᮪ ᮓᮩᮊᮩᮒ᮪ ᮊᮔ ᮞᮤᮞᮤᮔ ᮘᮞᮤᮞᮤᮁ, ᮌᮘᮢᮥᮊ᮪ ᮘᮆ ᮓᮤᮛᮧᮔ᮪ᮒᮧᮊ᮪ ᮊᮥ ᮛᮒᮥ ᮘᮥᮠᮚ ᮞᮁᮒ ᮒᮥᮜᮥᮚ᮪ ᮓᮤᮒᮩᮛᮩᮚ᮪.

ᮌᮨᮁ ᮛᮒᮥ ᮜᮅᮊ᮪ ᮕᮦᮞ᮪ᮒ; ᮞᮌᮜ ᮜᮅᮊ᮪ ᮙᮤᮏᮂ ᮏᮩᮀ ᮞᮌᮜ ᮘᮥᮠᮚ ᮙᮤᮏᮂ, ᮑᮨᮙ᮪ᮘᮂ ᮊ ᮊᮤ ᮘᮨᮔᮨᮁ.

ᮎᮦᮊ᮪ ᮊᮤ ᮘᮨᮔᮨᮁ: “ᮊᮥᮙᮠ, ᮃᮚᮩᮔ ᮅᮛᮀ ᮒᮩ ᮘᮧᮌ ᮛᮏ, ᮛᮦᮂ ᮛᮏ ᮓᮤᮛᮧᮔ᮪ᮒᮧᮊ᮪ ᮊᮥ ᮘᮥᮠᮚ”.

ᮍᮧᮙᮧᮀ ᮊᮤᮒᮥ ᮒᮦᮂ ᮊᮓᮍᮥ ᮊᮥ ᮙᮔ᮪ᮒᮢ, ᮕᮧᮀᮌᮝ ᮞᮥᮙᮝᮧᮔ᮪ᮔ ᮊᮥ ᮕᮒᮤᮂ.

ᮎᮛᮦᮊ᮪ ᮕᮒᮤᮂ ᮊ ᮊᮤ ᮘᮨᮔᮨᮁ: “ᮞᮥᮊᮥᮁ ᮕᮤᮞᮔ᮪, ᮆᮒ ᮛᮏ ᮓᮨᮀᮊᮤ ᮓᮤᮒᮩᮛᮩᮚ᮪ ᮊᮥ ᮛᮒᮥ ᮘᮥᮠᮚ. ᮆᮒ ᮛᮏ ᮠᮨᮔ᮪ᮒᮩ ᮘᮨᮔᮨᮁ ᮠᮒᮦᮔ, ᮊᮤ ᮘᮨᮔᮨᮁ ᮃᮔᮥ ᮘᮨᮔᮨᮁ ᮠᮒᮦᮔ ᮒᮦᮂ. ᮜᮩᮝᮤᮂ ᮠᮓᮨ ᮃᮚᮩᮔ ᮙᮂ, ᮞᮙ᮪ᮕᮦᮃᮔ᮪ ᮘᮆ ᮏᮥᮙᮨᮔᮨᮀ ᮛᮏ”.

ᮃᮒᮥᮂ ᮠᮛᮤᮒ ᮇᮌᮦ, ᮊᮤ ᮘᮨᮔᮨᮁ ᮏ᮪ᮜᮨᮌ᮪ ᮘᮆ ᮏᮨᮔᮨᮀ ᮛᮏ ᮓᮤᮃᮀᮊᮒ᮪ ᮊᮥ ᮕᮒᮤᮂ, ᮕᮧᮀᮌᮝ. ᮌᮨᮁ ᮞᮥᮛᮊ᮪ ᮞᮓᮚᮔ.

ᮛᮏ ᮘᮨᮔᮨᮁ ᮙᮛᮤᮊ᮪ᮞ ᮊ ᮕᮒᮤᮂ, ᮕᮧᮍᮝ ᮞᮅᮁᮔ: “ᮊᮥᮙᮠ ᮆᮒ ᮄᮞ᮪ᮒᮢᮤ ᮛᮏ ᮏᮩᮀ ᮞᮓᮚᮔ ᮘᮘᮔ᮪ᮓᮃᮔᮔ ᮊᮥᮓᮥ ᮓᮤᮊᮥᮙᮠᮊᮩᮔ᮪?”

ᮕᮤᮅᮔ᮪ᮏᮥᮊ᮪ ᮕᮒᮤᮂ: “ᮆᮒ ᮞᮓᮚ ᮃᮘ᮪ᮓᮤ ᮞᮨᮏ ᮑᮀᮌᮊᮩᮔ᮪ ᮊ ᮌᮙ᮪ᮕᮛᮔ᮪, ᮌᮩᮞ᮪ ᮊᮌᮥᮍᮔ᮪ ᮌᮙ᮪ᮕᮛᮔ᮪”.

ᮒᮤ ᮓᮤᮑ ᮛᮏ ᮘᮨᮔᮨᮁ ᮑᮅᮁ ᮞᮁᮒ ᮍᮝᮥᮛᮥᮊᮔ᮪ ᮊ ᮃᮘ᮪ᮓᮤᮔ ᮊᮘᮦᮂ: “ᮠᮨᮂ, ᮞᮊᮘᮦᮂ ᮙᮔ᮪ᮒᮢ, ᮕᮧᮀᮌᮝ ᮓᮦᮍᮦᮊᮩᮔ᮪ ᮄᮉ ᮕᮕᮒᮂ ᮊᮙᮤ: “ᮃᮔᮥ ᮊᮥᮙᮝᮥᮜ ᮊᮥᮓᮥ ᮘᮨᮔᮨᮁ ᮔᮥᮛᮥᮒ᮪ ᮊ ᮕᮤᮒᮥᮒᮥᮁ ᮙᮕᮚ᮪ ᮊᮔ ᮜᮙ᮪ᮕᮂ, ᮍᮓᮦᮍᮦ ᮊᮔ ᮎᮛᮦᮊ᮪. ᮏᮩᮀ ᮓᮩᮄ, ᮊ ᮘᮒᮥᮁ ᮅᮜᮂ ᮓᮆᮊ᮪ ᮓᮨᮀᮊᮤ, ᮊ ᮙᮦᮔᮊ᮪ ᮅᮜᮂ ᮛᮦᮊ᮪ ᮘᮨᮀᮊᮂ. ᮒᮂ, ᮎᮧᮔ᮪ᮒᮧᮔ ᮑ ᮓᮤᮛᮤ ᮊᮙᮤ ᮕᮤᮞᮔ᮪, ᮓᮤᮓᮨᮀᮊᮤᮃᮔ᮪ ᮊᮥ ᮛᮏ”.

“ᮒᮂ ᮊᮤᮄᮅ ᮊᮘᮥᮊ᮪ᮒᮤᮃᮔᮔ: ᮒᮤᮔ ᮞᮘᮘ᮪ ᮊᮘᮨᮔᮨᮛᮔ᮪ ᮠᮒᮨ, ᮒᮥᮀᮒᮥᮀᮔ ᮏᮓᮤ ᮛᮠᮚᮥ, ᮃᮚᮩᮔ ᮊᮙᮤ ᮌᮩᮞ᮪ ᮏᮓᮤ ᮛᮏ. ᮜᮙ᮪ᮕᮂ ᮅᮜᮂ ᮠᮚᮀ ᮊᮔ ᮊᮌᮥᮍᮔ᮪ ᮙᮦᮔᮊ᮪ ᮜᮙᮥᮔ᮪ ᮒᮩ ᮒᮨᮛᮀ ᮒᮤ ᮔᮥ ᮊᮌᮥᮍᮔ᮪; ᮒᮨᮙᮂᮔ ᮞᮧᮊ᮪ ᮜᮧᮌᮧᮁ ᮓᮤ ᮜᮤᮃᮀ ᮏᮛᮥᮙ᮪ ᮞᮨᮛᮨᮌ᮪ ᮓᮤ ᮘᮥᮃᮔ, ᮠᮁᮒᮤᮔ ᮊᮥᮙᮅᮜ ᮒᮦᮂ ᮊᮥᮓᮥ ᮞᮘᮨᮔᮨᮁᮔ”.

ᮛᮏ ᮒᮔ᮪ᮕᮄᮍᮔ᮪

ᮏᮙᮔ᮪ ᮘᮠᮩᮜ ᮃᮚ ᮓᮥᮃ ᮏᮜ᮪ᮙ ᮍᮛᮔ᮪ᮔ ᮃᮊᮤ ᮌᮔ᮪ᮓᮝᮛᮤ ᮏᮩᮀ ᮔᮤᮔᮤ ᮌᮔ᮪ᮓᮝᮛᮤ, ᮘᮧᮌ ᮃᮔᮊ᮪ ᮒᮤᮜᮥ, ᮍᮛᮔ᮪ᮔ ᮊᮤ ᮌᮤᮛᮤ, ᮊᮤ ᮜᮥᮀᮞᮤ ᮏᮩᮀ ᮊᮤ ᮒᮔ᮪ᮕᮄᮍᮔ᮪. ᮓᮤᮔ ᮠᮤᮏᮤ ᮙᮀᮞ, ᮄᮔ᮪ᮓᮥᮀᮔ ᮔᮑ ᮊ ᮃᮔᮊ᮪-ᮃᮔᮊ᮪ᮔ, ᮕᮧᮊ᮪ᮔ: “ᮔᮇᮔ᮪ ᮃᮚ ᮕᮞᮀᮌᮥᮕᮔ᮪ ᮙᮛᮔᮦᮂ ᮘᮛᮥᮓᮊ᮪?”

ᮃᮛᮤ ᮏᮝᮘ᮪ᮔ ᮊᮤ ᮌᮤᮛᮤ: “ᮊᮅᮜ ᮛᮦᮊ᮪ ᮍᮙᮥᮜᮡᮊᮩᮔ᮪”. ᮎᮩᮊ᮪ ᮊᮤ ᮜᮥᮀᮞᮤ: “ᮊᮅᮜ ᮙᮂ ᮛᮦᮊ᮪ ᮙᮀᮔᮨᮓᮊᮩᮔ᮪”, ᮃᮛᮤ ᮎᮩᮊ᮪ ᮊᮤ ᮒᮔ᮪ᮕᮄᮍᮔ᮪: “ᮊᮅᮜ ᮙᮂ, ᮒᮩ ᮃᮚ ᮑ ᮕᮞᮀᮌᮥᮕᮔ᮪ ᮍᮔ᮪ ᮠᮚᮀ ᮘᮧᮌ ᮆᮝᮦ ᮊ ᮓᮦᮝᮒ”.

ᮃᮒᮥᮂ ᮄᮔ᮪ᮓᮥᮀᮔ ᮑᮛᮦᮊᮔ᮪ ᮕᮧᮊ᮪ᮔ: “ᮔ, ᮞᮤᮃ ᮒᮦᮂ, ᮒᮔ᮪ᮕᮄᮍᮔ᮪ ᮠᮨᮔ᮪ᮒᮩ ᮘᮧᮌ ᮒᮩᮄᮀ ᮊᮤᮛ, ᮞᮊᮤᮉ ᮑ ᮙᮜᮛᮒ᮪ ᮃᮞ ᮔᮥᮛᮥᮞ᮪ ᮒᮥᮔ᮪ᮏᮥᮀ ᮒᮩᮄᮀ, ᮃᮛᮤ ᮃᮚᮩᮔ ᮙᮂ ᮞᮤᮃ ᮅᮜᮂ ᮃᮚ ᮓᮤ ᮓᮤᮉ, ᮜᮙᮥᮔ᮪ ᮊᮤᮒᮥ ᮑ ᮊᮛᮨᮕ᮪ ᮙᮂ”.

ᮒᮤ ᮓᮤᮑ ᮊᮤ ᮒᮔ᮪ᮕᮄᮍᮔ᮪ ᮄᮔ᮪ᮓᮤᮒ᮪ ᮜᮩᮙ᮪ᮕᮀ ᮞᮊᮕᮛᮔ᮪-ᮕᮛᮔ᮪. ᮒᮩ ᮜᮤᮜ ᮘᮦᮂ ᮙᮀᮌᮤᮂ ᮜᮨᮙ᮪ᮘᮥᮁ, ᮒᮥᮜᮥᮚ᮪ ᮙᮔᮦᮂᮔ ᮞᮙ᮪ᮕᮥᮛ ᮞᮥᮔ᮪, ᮏᮩᮀ ᮌᮔ᮪ᮎᮀ ᮓᮤᮒᮑ ᮊᮥ ᮔᮥ ᮘᮧᮌ ᮜᮨᮙ᮪ᮘᮥᮁ ᮕᮧᮊ᮪ᮔ: “ᮅᮛᮀ ᮙᮔ ᮞᮙ᮪ᮕᮦᮃᮔ᮪, ᮛᮦᮊ᮪ ᮔᮇᮔ᮪ ᮕᮤᮞᮨᮏᮉᮔ᮪ ᮏᮩᮀ ᮞᮠ ᮑ ᮍᮛᮔ᮪?”

ᮝᮀᮞᮥᮜ᮪ ᮊᮤ ᮒᮔ᮪ᮕᮄᮍᮔ᮪: “ᮊᮅᮜ ᮅᮛᮀ ᮜᮨᮙ᮪ᮘᮥᮁ ᮊᮝᮥᮀ ᮕᮥᮌᮥᮁ, ᮠᮚᮀ ᮊᮅᮜ ᮛᮦᮊ᮪ ᮘᮥᮘᮥᮛᮥᮂ, ᮃᮛᮤ ᮍᮛᮔ᮪ ᮒᮔ᮪ᮕᮄᮍᮔ᮪”.

ᮔᮥ ᮘᮧᮌ ᮜᮨᮙ᮪ᮘᮥᮁ ᮍᮧᮙᮧᮀ ᮓᮩᮄ ᮕᮧᮊ᮪ᮔ: “ᮊᮅᮜ ᮌᮦ ᮍᮅᮜ ᮊ ᮔᮀᮊᮧᮓ”.

ᮒᮨᮛᮥᮞ᮪ ᮊᮤ ᮒᮔ᮪ᮕᮄᮍᮔ᮪ ᮄᮔ᮪ᮓᮤᮒ᮪ ᮓᮩᮄ, ᮜᮩᮙ᮪ᮕᮀ ᮞᮊᮕᮛᮔ᮪-ᮕᮛᮔ᮪, ᮘᮦᮂ ᮙᮀᮌᮤᮂ ᮓᮩᮄ ᮜᮨᮙ᮪ᮘᮥᮁ. ᮒᮥᮜᮥᮚ᮪ ᮃᮞᮥᮕ᮪ ᮊᮤ ᮒᮔ᮪ᮕᮄᮍᮔ᮪ ᮏᮩᮀ ᮞᮙ᮪ᮕᮥᮛ ᮞᮥᮔ᮪ ᮊ ᮔᮥ ᮘᮧᮌ ᮜᮨᮙ᮪ᮘᮥᮁ.

ᮓᮤᮒᮑ ᮊᮥ ᮔᮥ ᮘᮧᮌ ᮜᮨᮙ᮪ᮘᮥᮁ: “ᮞᮙ᮪ᮕᮦᮃᮔ᮪ ᮒᮦᮂ ᮇᮛᮀ ᮙᮔ ᮏᮩᮀ ᮔᮇᮔ᮪ ᮔᮥ ᮓᮤᮞᮨᮏ: ᮞᮂ ᮑ ᮍᮛᮔ᮪?”

ᮝᮀᮞᮥᮜ᮪ ᮊᮤ ᮒᮔ᮪ᮕᮄᮍᮔ᮪: “ᮏᮤᮞᮤᮙ᮪ ᮊᮥᮛᮤᮀ ᮒᮤ ᮜᮨᮙ᮪ᮘᮥᮁ ᮊᮝᮥᮀ ᮕᮥᮌᮥᮁ. ᮃᮛᮤ ᮍᮛᮔ᮪ ᮒᮔ᮪ᮕᮄᮍᮔ᮪, ᮞᮨᮏ ᮊᮩᮄᮀ ᮛᮦᮊ᮪ ᮘᮥᮘᮥᮛᮥᮂ”.

ᮔᮥ ᮘᮧᮌ ᮜᮨᮙ᮪ᮘᮥᮁ ᮍᮝᮀᮞᮥᮜ᮪ ᮓᮩᮄ: “ᮊᮅᮜ ᮌᮦ ᮄᮉ ᮓᮥᮃ ᮜᮨᮙ᮪ᮘᮥᮁ ᮒᮦᮂ ᮒᮥᮊᮀ ᮊᮨᮘᮧᮔ᮪ ᮝᮀᮞᮥᮜ᮪, ᮑᮆᮒ ᮊᮌᮥᮍᮔ᮪ ᮔᮀᮊᮧᮓ”.

ᮒᮤ ᮓᮤᮑ ᮄᮔ᮪ᮓᮤᮒ᮪ ᮓᮩᮄ ᮊᮤ ᮒᮔ᮪ᮕᮄᮍᮔ᮪.

ᮜᮩᮙ᮪ᮕᮀ ᮜᮤᮜᮔ ᮌᮩᮞ᮪ ᮞᮘᮥᮜᮔ᮪, ᮒᮎᮔ᮪ ᮙᮀᮌᮤᮂ ᮘᮛᮀ ᮓᮠᮁ, ᮓᮤᮏᮜᮔ᮪ ᮙᮀᮌᮤᮂ ᮓᮩᮄ ᮞᮕᮤ, ᮙᮥᮔ᮪ᮓᮤᮀ ᮏᮩᮀ ᮈᮙ᮪ᮘᮦ ᮛᮚᮕ᮪.

ᮒᮤᮔ ᮘᮝᮔᮤᮀ ᮎᮕᮦ ᮊᮤ ᮒᮔ᮪ᮕᮄᮍᮔ᮪ ᮒᮦᮂ ᮉᮛᮩᮔ᮪ ᮠᮩᮜ.

ᮘᮛᮀ ᮙᮏᮥ ᮓᮩᮄ, ᮘᮦᮂ ᮙᮀᮌᮤᮂ ᮓᮩᮄ ᮠᮤᮏᮤ ᮜᮨᮙ᮪ᮘᮥᮁ, ᮕᮦᮊ᮪ ᮓᮤᮃᮞᮥᮕᮔ᮪.

ᮓᮤᮒᮑ ᮊᮤ ᮒᮔ᮪ᮕᮄᮍᮔ᮪ ᮊᮥ ᮔᮥ ᮘᮧᮌ ᮜᮨᮙ᮪ᮘᮥᮁ, ᮕᮧᮊ᮪ᮔ: “ᮃᮛᮤ ᮅᮏᮀ, ᮅᮛᮀ ᮙᮔ ᮏᮩᮀ ᮞᮠ ᮒᮥᮃᮀ ᮏᮨᮔᮨᮍᮔ᮪, ᮔᮇᮔ᮪ ᮃᮔᮥ ᮓᮤᮞᮨᮏ?”

ᮊᮤ ᮒᮔ᮪ᮕᮄᮍᮔ᮪ ᮍᮝᮀᮞᮥᮜ᮪: “ᮊᮥᮛᮤᮀ ᮒᮦᮂ ᮒᮤ ᮊᮝᮥᮀ ᮕᮥᮌᮥᮁ, ᮍᮛᮔ᮪ ᮊᮥᮛᮤᮀ ᮒᮔ᮪ᮕᮄᮍᮔ᮪, ᮞᮨᮏ ᮛᮦᮊ᮪ ᮘᮥᮘᮥᮛᮥᮂ; ᮔᮥ ᮙᮝᮤ ᮊᮩᮛᮤᮀ ᮍᮓᮩᮠᮩᮞ᮪”.

ᮔᮥ ᮘᮧᮌ ᮜᮨᮙ᮪ᮘᮥᮁ ᮍᮝᮀᮞᮥᮜ᮪: “ᮃᮒᮥᮂ, ᮊᮤ ᮒᮔ᮪ᮕᮄᮍᮔ᮪. ᮊᮅᮜ ᮌᮦ ᮘᮥᮘᮥᮛᮥᮂ ᮓᮩᮄ ᮊ ᮔᮀᮊᮧᮓ, ᮞᮥᮌᮔ᮪ ᮊᮓᮤᮒᮥ ᮘᮆ, ᮊ ᮒᮥᮊᮀ ᮞᮚᮥᮛᮔ᮪, ᮘᮨᮏᮔ ᮒᮩ ᮃᮚ ᮘᮒᮥᮁᮔ”.

ᮒᮥᮜᮥᮚ᮪ ᮊ ᮒᮥᮊᮀ ᮞᮚᮥᮛᮔ᮪; ᮊᮥ ᮒᮥᮊᮀ ᮞᮚᮥᮛᮔ᮪ ᮓᮤᮒᮥᮓᮥᮂᮊᮩᮔ᮪ ᮊ ᮒᮥᮊᮀ ᮞᮞᮕᮥ ᮓᮤ ᮏᮨᮛᮧ ᮌᮨᮓᮧᮀ.

ᮕᮧᮊ᮪ ᮞᮙ᮪ᮕᮥᮛ ᮞᮥᮔ᮪ ᮊ ᮒᮥᮊᮀ ᮞᮞᮕᮥ, ᮊᮥ ᮒᮥᮊᮀ ᮞᮞᮕᮥ ᮓᮤᮛᮙ᮪ᮕᮦᮞ᮪ᮊᮩᮔ᮪.

ᮘᮛᮀ ᮓᮧᮀᮊᮕ᮪ ᮊ ᮓᮤᮑ, ᮊᮒᮤᮍᮜᮤ ᮊᮥ ᮔᮀᮊᮧᮓ, ᮔᮀᮊᮧᮓ ᮙᮛᮤᮊ᮪ᮞ ᮊ ᮒᮥᮊᮀ ᮞᮞᮕᮥ, ᮞᮅᮁᮔ: “ᮆᮒ ᮏᮜ᮪ᮙ, ᮅᮛᮀ ᮙᮔ?”

ᮒᮥᮊᮀ ᮞᮞᮕᮥ ᮍᮝᮀᮞᮥᮜ᮪: “ᮞᮥᮙᮥᮠᮥᮔ᮪ ᮒᮩ ᮃᮎᮔ᮪ ᮓᮤᮕᮛᮤᮊ᮪ᮞ”.

ᮊᮤ ᮒᮔ᮪ᮕᮄᮍᮔ᮪ ᮒᮥᮜᮥᮚ᮪ ᮘᮆ ᮅᮔ᮪ᮏᮥᮊᮔ᮪, ᮕᮧᮊ᮪ᮔ: “ᮊᮅᮜᮔᮥᮔ᮪ ᮌᮥᮞ᮪ᮒᮤ, ᮃᮘ᮪ᮓᮤ ᮒᮦᮂ ᮅᮛᮀ ᮊᮝᮥᮀ ᮕᮥᮌᮥᮁ, ᮃᮛᮤ ᮍᮛᮔ᮪ ᮒᮔ᮪ᮕᮄᮍᮔ᮪; ᮞᮨᮏ ᮃᮘ᮪ᮓᮤ ᮛᮦᮊ᮪ ᮘᮥᮘᮥᮛᮥᮂ”.

ᮔᮀᮊᮧᮓ ᮍᮜᮠᮤᮁ: “ᮙᮀᮞ ᮃᮚᮩᮔ ᮙᮂ ᮔᮥᮏᮥ ᮊᮩᮁ ᮒᮩ ᮃᮚ ᮕᮌᮝᮦᮃᮔ᮪, ᮒᮕᮤ ᮙᮥᮔ᮪ ᮓᮆᮊ᮪ ᮞᮥᮌᮔ᮪ ᮓᮤᮕᮨᮎᮊ᮪-ᮕᮨᮎᮊ᮪ ᮏᮓᮤ ᮙᮔ᮪ᮓᮧᮁ ᮘᮨᮞᮁ ᮘᮆ, ᮒᮂ ᮊᮥᮓᮔ, ᮒᮂ ᮛᮛᮀᮊᮦᮔ᮪ᮔ. ᮞᮌᮜ ᮘᮔ᮪ᮓ ᮊᮅᮜ ᮊᮥᮓᮥ ᮓᮤᮛᮧᮔ᮪ᮓ, ᮃᮛᮤ ᮍᮛᮧᮔ᮪ᮓᮔ ᮜᮤᮜᮔ ᮒᮤᮜᮥ ᮘᮥᮜᮔ᮪. ᮊᮤᮒᮥ ᮓᮩᮄ, ᮈᮀᮊᮦ, ᮜᮙᮥᮔ᮪ ᮌᮩᮞ᮪ ᮔᮨᮕᮤ ᮊ ᮜᮩᮝᮩᮀ ᮜᮛᮍᮔ᮪, ᮊᮔ ᮜᮩᮝᮩᮀ ᮆᮒ ᮅᮜᮂ ᮛᮦᮊ᮪ ᮎᮦᮊ᮪ᮎᮧᮊ᮪ ᮏᮩᮀ ᮅᮜᮂ ᮞᮒᮦᮔ᮪ᮏᮧ-ᮒᮦᮔ᮪ᮏᮧᮔ; ᮃᮛᮤ ᮍᮛᮔ᮪ᮔ ᮆᮒ ᮜᮩᮝᮩᮀ ᮒᮦᮂ ᮜᮩᮝᮩᮀ ᮞᮤᮔᮕᮥᮜ᮪. ᮓᮤᮘᮦᮛᮦ ᮌᮏᮤᮂ ᮞᮘᮥᮜᮔ᮪ ᮇᮕᮒ᮪ ᮕᮥᮜᮥᮂ ᮛᮦᮃᮜ᮪ ᮏᮩᮀ ᮕᮊᮦ ᮏᮩᮀ ᮓᮠᮁ; ᮕᮦᮊ᮪, ᮃᮚᮩᮔ ᮙᮂ, ᮌᮩᮛ ᮘᮆ, ᮍᮛᮧᮔ᮪ᮓ!’

ᮌᮔ᮪ᮎᮀᮔ ᮊᮤ ᮒᮔ᮪ᮕᮄᮍᮔ᮪ ᮒᮥᮜᮥᮚ᮪ ᮑᮧᮛᮦᮔ᮪ ᮕᮨᮓᮀ; ᮒᮥᮙ᮪ᮕᮊ᮪ ᮊᮥᮓ, ᮒᮨᮛᮥᮞ᮪ ᮍᮛᮧᮔ᮪ᮓ ᮊᮜᮤᮝᮒ᮪ ᮌᮤᮔ᮪ᮓᮤᮀᮔ ᮒᮦᮂ.

ᮍᮛᮧᮔ᮪ᮓᮔ ᮃᮕᮤᮊ᮪ ᮕᮤᮞᮔ᮪, ᮠᮨᮔ᮪ᮒᮩ ᮃᮚ ᮔᮥ ᮊᮜᮤᮝᮒ᮪, ᮙᮛᮦᮔ᮪ᮒᮂ ᮊ ᮞᮊᮘᮦᮂ ᮕᮒᮥᮊᮍᮔ᮪: ᮒᮥᮊᮀ ᮞᮚᮥᮛᮔ᮪, ᮒᮥᮊᮀ ᮞᮝᮂ, ᮞᮧᮃᮀ, ᮙᮨᮛᮤ, ᮙᮔᮥᮊ᮪-ᮙᮔᮥᮊ᮪, ᮙᮨᮛᮊ᮪ ᮏᮩᮀ ᮏᮕᮒᮤ, ᮊᮞᮤᮔ᮪ᮒᮥ ᮏᮩᮀ ᮕᮥᮚᮥᮂ ᮌᮧᮀᮌᮧᮀ. ᮓᮨᮓᮨᮛᮧᮊ᮪ ᮏᮩᮀ ᮊᮓᮔ᮪ᮎ, ᮃᮔᮥ ᮜᮩᮒᮤᮊ᮪ ᮞᮔᮏᮔ᮪ ᮌᮜᮒᮤᮊ᮪, ᮒᮤᮒᮤᮛᮔ᮪ ᮏᮩᮀ ᮕᮥᮚᮥᮂ ᮝᮒᮥ ᮏᮩᮀ ᮞᮏᮘ ᮒᮤ ᮓᮤᮑ.

ᮊᮤ ᮒᮔ᮪ᮕᮄᮍᮔ᮪ ᮒᮥᮙ᮪ᮕᮊ᮪ ᮊᮥᮓ ᮘᮛᮤ ᮒᮨᮙ᮪ᮘᮀ ᮕᮀᮊᮥᮁ ᮊᮜᮤᮝᮒ᮪ ᮙᮒᮊ᮪ ᮜᮥᮎᮥ. ᮊᮊᮝᮤᮠᮔ᮪ ᮞᮨᮙᮥ ᮃᮔᮥ ᮔᮜᮀᮞ, ᮊᮤᮉ ᮕᮧᮊ᮪ᮕᮧᮊᮔᮔ:

“ᮙᮨᮜᮞ᮪-ᮙᮨᮜᮤᮞ᮪ ᮑᮨᮛᮤ ᮙᮔᮂ,

“ᮜᮤᮝᮒ᮪ ᮜᮀᮊᮥᮀ ᮛᮞ ᮘᮤᮍᮥᮀ ᮘᮓᮔ᮪ ᮃᮄᮀ,

“ᮏᮅᮂ ᮊᮜᮕ ᮊ ᮞᮤᮔ᮪ᮒᮥᮀ,

“ᮊᮥᮒᮔ᮪ ᮊᮨᮄᮅ ᮃᮛᮤ ᮊᮨᮙ᮪ᮘᮀ,

“ᮔᮌᮞᮛᮤ ᮅᮜ ᮞᮔ᮪ᮓᮤ ᮜᮥᮠᮥᮁ ᮌᮥᮔᮥᮀ.

“ᮊᮔᮍ ᮓᮤᮕᮔᮂ ᮌᮨᮜᮕ᮪,

“ᮞᮚᮀ ᮝᮜᮤᮊ᮪ ᮏᮩᮀ ᮏᮕᮒᮤ

“ᮞᮤᮎᮨᮙ᮪ᮕ ᮊᮩᮁ ᮜᮜᮚᮛᮔ᮪,

“ᮑᮛᮒᮥᮃᮔ᮪ ᮊᮜᮀᮊᮀ ᮍᮤᮔᮥᮙᮔ᮪ ᮎᮄ,

“ᮏᮅᮂ ᮊ ᮘᮕ ᮊ ᮄᮔ᮪ᮓᮥᮀ,

“ᮊᮥᮒᮔ᮪ ᮊᮤᮉ ᮃᮚᮩᮔ ᮙᮂ,

“ᮌᮩᮞ᮪ ᮊᮕᮀᮌᮤᮂ ᮒᮥᮌᮨᮔᮂ ᮛᮞ ᮔᮥ ᮕᮥᮔ᮪ᮓᮥᮀ,

“ᮑ ᮛᮌ ᮛᮞ ᮒᮤᮞᮨᮜᮕ᮪,

“ᮙᮛᮨᮜᮀ ᮊ ᮔᮥ ᮓᮤᮘᮥᮙᮤ”.

ᮍᮝᮤᮂᮔ ᮊᮤᮒᮥ ᮘᮛᮤ ᮑᮥᮛᮥᮎᮥᮓ᮪ ᮎᮤᮕᮔᮧᮔ᮪.

ᮅᮛᮀ ᮒᮥᮔ᮪ᮓ ᮒᮨᮙ᮪ᮘᮀᮔ ᮒᮔ᮪ᮕᮄᮍᮔ᮪.

ᮌᮔ᮪ᮎᮀᮔ, ᮌᮩᮞ᮪ ᮔᮨᮕᮤ ᮊ ᮜᮩᮝᮩᮀ ᮞᮤᮔᮕᮥᮜ᮪. ᮘᮛᮀ ᮞᮥᮕ᮪-ᮃᮞᮥᮕ᮪ ᮊ ᮜᮩᮝᮩᮀ, ᮙᮔᮦᮂᮔ ᮔᮦᮔ᮪ᮏᮧ, ᮃᮚ ᮃᮔᮥ ᮊᮩᮁ ᮞᮤᮛᮙ᮪ ᮓᮤᮔ ᮝᮠᮍᮔ᮪.

ᮘᮛᮀ ᮓᮤᮒᮨᮙ᮪ᮕᮧ ᮊᮥ ᮊᮤ ᮒᮔ᮪ᮕᮄᮍᮔ᮪, ᮘᮨᮒ᮪ ᮕᮥᮒᮢᮤ ᮌᮛᮩᮜᮤᮞ᮪ ᮊᮘᮤᮔ-ᮘᮤᮔ, ᮛᮦᮃᮔ ᮒᮥᮏᮥᮂ.

ᮒᮥᮜᮥᮚ᮪ ᮘᮆ ᮓᮤᮌᮨᮘᮂ ᮊᮥ ᮊᮤ ᮒᮔ᮪ᮕᮄᮍᮔ᮪, ᮃᮒᮥᮂ ᮕᮥᮒᮢᮤ ᮒᮦᮂ ᮊᮘᮦᮂ ᮜᮜᮥᮙ᮪ᮕᮒᮔ᮪. ᮘᮛᮀ ᮊᮩᮁ ᮜᮥᮜᮥᮙ᮪ᮕᮒᮔ᮪, ᮃᮚ ᮔᮥ ᮜᮘᮥᮂ ᮠᮤᮏᮤ; ᮒᮥᮜᮥᮚ᮪ ᮓᮤᮛᮧᮔ᮪ᮒᮧᮊ᮪ ᮊᮥ ᮊᮤ ᮒᮔ᮪ᮕᮄᮍᮔ᮪, ᮞᮁᮒ ᮓᮤᮘᮝ ᮜᮥᮙ᮪ᮕᮒ᮪ ᮊ ᮒᮥᮊᮀ ᮞᮕᮤ.

ᮒᮥᮊᮀ ᮞᮕᮤ ᮊᮌᮨᮒ᮪ ᮊᮘᮤᮔ-ᮘᮤᮔ ᮘᮛᮤ ᮍᮧᮙᮧᮀ: “ᮔᮠ ᮆᮒ ᮏᮜ᮪ᮙ ᮒᮦᮂ ᮘᮌ᮪ᮏ-ᮘᮌ᮪ᮏ ᮒᮨᮙᮨᮔ᮪ ᮏᮩᮀ ᮔᮠ ᮃᮚ ᮜᮥᮓᮩᮍᮔ᮪ ᮓᮒᮀ ᮊ ᮘᮤᮞ ᮑᮧᮊᮧᮒ᮪ ᮓᮦᮝᮒ”.

ᮎᮦᮊ᮪ ᮊᮤ ᮒᮔ᮪ᮕᮄᮍᮔ᮪ ᮊ ᮒᮥᮊᮀ ᮞᮕᮤ; “ᮕᮜᮀᮞᮤᮃᮀ ᮊᮅᮜ ᮓᮤᮕᮆᮠᮔ᮪, ᮎᮤᮊ᮪, ᮌᮩᮝᮒ᮪ ᮊᮅᮜ ᮕᮍᮥᮔ᮪ᮏᮥᮊ᮪ᮊᮩᮔ᮪ ᮊ ᮏᮥᮛᮌᮔ᮪”.

ᮒᮥᮜᮥᮚ᮪ ᮒᮥᮊᮀ ᮞᮕᮤ ᮒᮥᮙ᮪ᮕᮊ᮪ ᮊᮥᮓ; ᮓᮤᮒᮨᮌᮁᮊᮩᮔ᮪ ᮞᮁᮒ ᮓᮤᮃᮀᮞᮤᮒ᮪-ᮃᮀᮞᮤᮒ᮪.

ᮊᮧᮎᮕ᮪ᮊᮩᮔ᮪ ᮌᮩᮞ᮪ ᮓᮒᮀ ᮊ ᮔᮀᮊᮧᮓ.

ᮔᮀᮊᮧᮓ ᮙᮛᮤᮊ᮪ᮞ, ᮞᮅᮁᮔ: “ᮛᮦᮊ᮪ ᮔᮇᮔ᮪ ᮙᮔᮦᮂ?”

ᮕᮤᮅᮔ᮪ᮏᮥᮊ᮪ ᮒᮥᮊᮀ ᮞᮕᮤ: “ᮏᮤᮞᮤᮙ᮪ ᮃᮘ᮪ᮓᮤ ᮍᮥᮔ᮪ᮏᮥᮊ᮪ᮊᮩᮔ᮪ ᮃᮘ᮪ᮓᮤ ᮌᮥᮞ᮪ᮒᮤ, ᮕᮥᮔ᮪ ᮒᮔ᮪ᮕᮄᮍᮔ᮪, ᮃᮚᮩᮔ ᮊᮦᮍᮤᮀ ᮓᮦᮝᮒ ᮒᮤ ᮜᮩᮝᮩᮀ ᮞᮤᮔᮕᮥᮜ᮪, ᮙᮜᮂ ᮃᮚᮩᮔ ᮇᮌᮦ ᮕᮛᮔ᮪ᮒᮧᮞ᮪ ᮃᮚ ᮓᮤ ᮛᮧᮛᮧᮙ᮪ᮕᮧᮊ᮪ ᮏᮤᮞᮤᮙ᮪ ᮃᮘ᮪ᮓᮤ”.

ᮔᮀᮊᮧᮓ ᮍᮛᮔ᮪ᮏᮥᮌ᮪ ᮞᮁᮒ ᮘᮛᮤ ᮍᮜᮠᮤᮁ: “ᮃᮚᮩᮔ, ᮙᮔᮦᮂ ᮌᮩᮝᮒ᮪ ᮘᮜᮤᮊ᮪ ᮓᮩᮄ ᮘᮆ, ᮄᮞᮥᮊ᮪ ᮊᮥ ᮊᮙᮤ ᮛᮦᮊ᮪ ᮓᮤᮒᮦᮃᮀ”.

ᮒᮥᮊᮀ ᮞᮕᮤ ᮌᮔ᮪ᮎᮀ ᮘᮜᮤᮊ᮪ ᮓᮩᮄ.

ᮌᮩᮞ᮪ ᮓᮒᮀ ᮊᮤ ᮒᮔ᮪ᮕᮄᮍᮔ᮪, ᮒᮔ᮪ᮕᮄᮍᮔ᮪ ᮙᮛᮤᮊ᮪ᮞ “ᮊᮥᮙᮠ ᮓᮝᮥᮠᮔ᮪ ᮏᮥᮛᮌᮔ᮪?”

ᮎᮦᮊ᮪ ᮒᮥᮊᮀ ᮞᮕᮤ: “ᮄᮞᮥᮊ᮪ ᮘᮓᮦ ᮓᮤᮒᮦᮃᮀ”.

ᮎᮦᮊ᮪ ᮊᮤ ᮒᮔ᮪ᮕᮄᮍᮔ᮪: “ᮞᮥᮊᮥᮁ, ᮃᮛᮤ ᮊᮤᮒᮥ ᮙᮂ”.

ᮒᮥᮔ᮪ᮓ ᮊᮤ ᮒᮔ᮪ᮕᮄᮍᮔ᮪.

ᮊᮧᮎᮕ᮪ᮊᮩᮔ᮪ ᮜᮙ᮪ᮕᮂ ᮔᮀᮊᮧᮓ; ᮍᮥᮔᮤᮍ ᮊ ᮔᮌᮛ ᮒᮔ᮪ᮏᮥᮀ ᮛᮨᮞᮤᮊ᮪, ᮍᮓᮩᮠᮩᮞ᮪ ᮊ ᮕᮚᮥᮔᮩᮔ᮪ ᮛᮏ.

ᮛᮏ ᮙᮛᮤᮊ᮪ᮞ: “ᮛᮦᮊ᮪ ᮊ ᮙᮔ ᮊᮤ ᮔᮀᮊᮧᮓ, ᮒᮛ-ᮒᮛ ᮒᮤ ᮞᮞᮛᮤ ᮊᮓᮤᮉ, ᮊᮅᮜ ᮙᮂ ᮛᮩᮝᮞ᮪”.

ᮕᮤᮅᮔ᮪ᮏᮥᮊ᮪ ᮔᮀᮊᮧᮓ: “ᮃᮔᮥ ᮙᮝᮤ ᮏᮤᮞᮤᮙ᮪ ᮃᮘ᮪ᮓᮤ ᮍᮓᮩᮠᮩᮞ᮪ ᮘᮓᮦ ᮑᮀᮌᮊᮩᮔ᮪ ᮃᮘ᮪ᮓᮤᮌᮙ᮪ᮕᮛᮔ᮪, ᮕᮥᮔ᮪ ᮒᮔ᮪ᮕᮄᮍᮔ᮪, ᮛᮦᮂ ᮊᮦᮍᮤᮀ ᮓᮦᮝᮒ ᮒᮤ ᮜᮩᮝᮩᮀ ᮞᮤᮔᮕᮥᮜ᮪”.

ᮛᮏ ᮍᮛᮔ᮪ᮏᮥᮌ᮪ ᮘᮛᮤ ᮒᮥᮀᮊᮥᮜ᮪.

ᮒᮩ ᮜᮙᮤ ᮛᮏ ᮍᮜᮠᮤᮁ: “ᮔᮠ ᮈᮑ, ᮠᮨᮔ᮪ᮒᮩ ᮞᮜᮚ, ᮜᮙᮥᮔ᮪ ᮞᮜᮂ, ᮔᮀᮊᮧᮓ, ᮊᮥ ᮊᮅᮜ ᮈᮀᮊᮦ ᮓᮤᮒᮩᮊ᮪ᮒᮩᮊ᮪ ᮘᮩᮠᮩᮀ”.

ᮍᮜᮠᮤᮁ ᮓᮩᮄ ᮛᮏ ᮊ ᮕᮒᮤᮂ, ᮓᮝᮥᮠᮔᮔ: “ᮕᮒᮤᮂ, ᮌᮩᮛ ᮞᮓᮤᮃ ᮕᮛᮦᮔ᮪ᮒᮂᮊᮩᮔ᮪ ᮓᮀᮓᮔ᮪ ᮊᮛᮦᮒ ᮏᮩᮀ ᮞᮌᮜ ᮒᮒᮘᮩᮠᮔ᮪”.

ᮕᮒᮤᮂ ᮙᮛᮦᮔ᮪ᮒᮂᮔ ᮌᮩᮞ᮪ ᮞᮓᮤᮃ, ᮆᮀᮌᮜ᮪ ᮅᮔ᮪ᮏᮥᮊᮔ᮪ ᮊ ᮛᮏ, ᮚᮦᮔ᮪ ᮒᮤᮒᮤᮠᮔ᮪ ᮞᮛᮨᮀ ᮒᮒᮘᮩᮠᮔ᮪ ᮕᮛᮔ᮪ᮒᮧᮞ᮪ ᮞᮚᮌ.

ᮆᮀᮌᮜ᮪ᮔ ᮛᮏ ᮜᮥᮀᮞᮥᮁ ᮏᮩᮀ ᮔᮀᮊᮧᮓ ᮛᮝᮥᮂ ᮌᮩᮛᮩᮠᮔ ᮞᮊᮛᮦᮒ.

ᮘᮛᮀ ᮏᮨᮀᮊᮁ, ᮓᮥᮁ ᮙᮛᮤᮈᮙ᮪, ᮌᮨᮁ ᮞᮌᮜ ᮒᮒᮘᮥᮠᮔ᮪, ᮠᮞᮩᮕ᮪ ᮘᮨᮓᮤᮜ᮪ ᮠᮜᮤᮙᮥᮔᮔ᮪ ᮞᮕᮕᮛᮒ᮪ ᮏᮜᮔ᮪.

ᮊᮧᮎᮕ᮪ᮊᮩᮔ᮪ ᮌᮩᮞ᮪ ᮞᮥᮙ᮪ᮕᮤᮀ ᮊ ᮄᮙᮂᮔ ᮒᮥᮊᮀ ᮞᮕᮤ ᮒᮦᮃ. ᮊᮤ ᮒᮔ᮪ᮕᮄᮍᮔ᮪ ᮌᮝᮦᮔ ᮍᮥᮕᮠᮔ᮪ ᮕᮥᮒᮢᮤ ᮘᮆ, ᮕᮧᮊ᮪ᮔ: “ᮄᮒᮥ ᮌᮩᮜᮤᮞ᮪, ᮃᮔᮥ ᮙᮕᮌ᮪ ᮅᮛᮀ, ᮒᮤᮍᮜᮤ; ᮙᮩᮌᮩᮞ᮪, ᮌᮩᮜᮤᮞ᮪, ᮅᮜᮂ ᮔᮍᮤᮞ᮪ ᮒᮩᮄᮀ”.

ᮆᮀᮌᮜ᮪ᮔ ᮛᮏ ᮜᮥᮀᮞᮥᮁ ᮒᮤᮔ ᮊᮛᮦᮒ ᮞᮛᮨᮀ ᮔᮀᮊᮧᮓ ᮛᮝᮥᮂ ᮄᮞ᮪ᮒᮢᮤᮔ, ᮔᮛᮤᮍᮜᮤ ᮊ ᮑᮤ ᮕᮥᮒᮢᮤ ᮒᮦᮃ, ᮞᮁᮒ ᮒᮥᮜᮥᮚ᮪ ᮓᮤᮛᮛᮧᮔ᮪ᮒᮧᮊᮔ᮪, ᮓᮤᮕᮚᮀ ᮊᮔ ᮊᮛᮦᮒ.

ᮏᮜ᮪ᮙ ᮊᮘᮦᮂ ᮕᮓ ᮊᮛᮌᮦᮒ᮪, ᮞᮅᮙᮥᮁ ᮊᮊᮛ ᮙᮀᮌᮤᮂ ᮝᮤᮓᮓᮛᮤ ᮃᮔᮥ ᮞᮊᮤᮒᮥ ᮌᮩᮜᮤᮞ᮪ᮔ ᮘᮛᮤ ᮑᮛᮨᮘᮥᮒ᮪ᮊᮩᮔ᮪: “ᮔᮠ ᮛᮏ ᮘᮌ᮪ᮏ ᮒᮨᮙᮨᮔ᮪!”

ᮃᮔᮥ ᮔᮛᮤᮒᮤᮂ ᮊᮛᮦᮒ: ᮛᮏ, ᮄᮞ᮪ᮒᮢᮤᮔ, ᮔᮀᮊᮧᮓ, ᮊᮤ ᮒᮔ᮪ᮕᮄᮍᮔ᮪ ᮏᮩᮀ ᮕᮥᮒᮢᮤ ᮒᮦᮃ; ᮕᮥᮀᮊᮥᮛᮩᮔ᮪ ᮊᮛᮦᮒ ᮕᮒᮤᮂ ᮞᮛᮨᮀ ᮞᮌᮜ ᮒᮒᮘᮩᮠᮔ᮪. ᮌᮨᮁ ᮞᮥᮛᮊ᮪ ᮞᮓᮚᮔ.

ᮒᮩ ᮊᮎᮒᮥᮁᮊᮩᮔ᮪ ᮓᮤ ᮏᮜᮔ᮪ᮔ.

ᮊᮧᮎᮕ᮪ᮊᮩᮔ᮪ ᮌᮩᮞ᮪ ᮞᮥᮙ᮪ᮕᮤᮀ ᮊ ᮔᮌᮛ. ᮃᮜᮥᮔ᮪-ᮃᮜᮥᮔ᮪ ᮠᮩᮛᮤᮔ᮪ ᮅᮞᮤᮊ᮪ ᮊᮥ ᮏᮨᮜᮨᮙ: ᮘᮥᮓᮊ᮪, ᮊᮧᮜᮧᮒ᮪, ᮊᮘᮦᮂ ᮓᮧᮀᮊᮕ᮪, ᮕᮦᮞ᮪ᮒᮔ ᮒᮤᮜᮥ ᮕᮧᮆ ᮒᮤᮜᮥ ᮕᮩᮒᮤᮀ ᮊᮜᮤᮝᮒ᮪ ᮛᮙᮦᮔ.

ᮛᮏ ᮜᮤᮝᮒ᮪ ᮜᮀᮊᮥᮀ ᮃᮞᮤᮂ ᮊ ᮊᮤ ᮒᮔ᮪ᮕᮄᮍᮔ᮪, ᮓᮤᮕᮕᮛᮤᮔ᮪ ᮓᮥᮄᮒ᮪ ᮞᮁᮒ ᮕᮕᮊᮦᮃᮔ᮪.

ᮊᮤᮛ-ᮊᮤᮛ ᮌᮩᮞ᮪ ᮌᮨᮔᮨᮕ᮪ ᮘᮥᮜᮔ᮪ ᮜᮤᮜᮔ ᮒᮤ ᮠᮛᮤᮒ, ᮛᮏ ᮍᮀᮜᮥᮂ; ᮒᮤᮔ ᮘᮝᮔᮤᮀ ᮘᮍᮨᮒ᮪ ᮊᮞᮝᮒ᮪ ᮆᮀᮌᮜ᮪ᮔ ᮕᮥᮕᮥᮞ᮪.

ᮞᮥᮞᮂ ᮞᮓᮚᮔ ᮃᮘ᮪ᮓᮤ-ᮃᮘ᮪ᮓᮤ.

ᮃᮛᮤ ᮞᮅᮁ ᮔᮀᮊᮧᮓ: “ᮃᮚᮩᮔ ᮙᮂ ᮃᮔᮊ᮪ ᮊᮙᮤ ᮘᮆ, ᮊᮤ ᮒᮔ᮪ᮕᮄᮍᮔ᮪ ᮏᮓᮤᮊᮩᮔ᮪ ᮛᮏ”.

ᮆᮀᮌᮜ᮪ᮔ ᮛᮨᮙ᮪ᮕᮥᮌ᮪ ᮞᮓᮚᮔ, ᮜᮏᮨᮀ ᮊᮤ ᮒᮔ᮪ᮕᮄᮍᮔ᮪ ᮓᮤᮏᮨᮔᮨᮀᮊᮩᮔ᮪ ᮛᮏ, ᮕᮥᮒᮢᮤ ᮓᮤᮞᮦᮛᮦᮔ᮪ᮊᮩᮔ᮪ ᮛᮝᮥᮂ ᮞᮓᮚᮔ ᮘᮔ᮪ᮓ ᮛᮏ, ᮑ ᮊᮤᮒᮥ ᮓᮩᮄ ᮞᮔᮏᮔ᮪ ᮘᮔ᮪ᮓ ᮔᮀᮊᮧᮓ ᮊᮘᮦᮂ ᮓᮤᮕᮞᮢᮂᮊᮩᮔ᮪. ᮆᮒ ᮔᮀᮊᮧᮓ ᮕᮊᮅᮜᮔ᮪ ᮑᮝᮦᮁᮔ ᮊᮥ ᮓᮥᮄᮒ᮪ ᮝᮥᮀᮊᮥᮜ᮪ ᮘᮦᮃᮊ᮪ |᮲᮰᮰᮰᮰| ᮛᮥᮕᮤᮃ. ᮓᮥᮁ ᮙᮛᮤᮈᮙ᮪, ᮌᮨᮁ ᮞᮌᮜ ᮒᮒᮘᮩᮠᮔ᮪, ᮠᮩᮛᮤᮔ᮪ ᮅᮞᮤᮊ᮪ ᮊᮥ ᮔᮥ ᮜᮜᮏᮧ.

ᮒᮥᮔ᮪ᮓ ᮓᮩᮄ ᮔᮥ ᮊᮩᮁ ᮕᮦᮞ᮪ᮒ.

ᮊᮎᮛᮤᮒᮊᮩᮔ᮪ ᮄᮔ᮪ᮓᮥᮀ ᮘᮕᮔ ᮊᮤ ᮒᮔ᮪ᮕᮄᮍᮔ᮪. ᮊᮛᮨᮕ᮪ᮔ ᮠᮚᮀ ᮜᮜᮏᮧ ᮊ ᮔᮌᮛ, ᮛᮦᮂᮔ ᮓᮤ ᮔᮌᮛ ᮛᮏ ᮊᮩᮁ ᮕᮦᮞ᮪ᮒ ᮞᮁᮒ ᮍᮝᮥᮁ-ᮍᮝᮥᮁ ᮓᮥᮄᮒ᮪.

ᮎᮦᮊ᮪ ᮄᮔ᮪ᮓᮥᮀᮔ ᮊᮤ ᮒᮔ᮪ᮕᮄᮍᮔ᮪: “ᮃᮊᮤ, ᮠᮚᮥ, ᮅᮛᮀ ᮜᮜᮏᮧ ᮘᮛᮤ ᮞᮥᮌᮔ᮪ ᮘᮆ ᮅᮛᮀ ᮊᮘᮌᮤᮃᮔ᮪ ᮞᮨᮒᮦᮀ ᮙᮂ”.

ᮒᮤ ᮓᮤᮑ ᮒᮥᮜᮥᮚ᮪ ᮃᮛᮤᮔ᮪ᮓᮤᮒ᮪. ᮘᮛᮀ ᮓᮒᮀ ᮊ ᮔᮥ ᮍᮝᮥᮁ-ᮍᮝᮥᮁ ᮓᮥᮄᮒ᮪, ᮕᮓ ᮑᮛᮦᮊᮔ᮪ ᮒᮦᮂ, ᮘᮞᮔ: “ᮠᮦᮂ ᮘᮕ ᮅᮜᮂ ᮊ ᮓᮤᮉ”

ᮒᮩ ᮜᮤᮜ ᮏᮧᮜ᮪ ᮃᮚ ᮕᮤᮝᮛᮍᮔ᮪ ᮛᮏ, ᮙᮛᮤᮊ᮪ᮞ ᮊ ᮃᮊᮤ-ᮃᮊᮤ ᮞᮁᮒ ᮊ ᮔᮤᮔᮤ ᮒᮦᮃ.

ᮎᮦᮊ᮪ ᮕᮤᮝᮛᮍᮔ᮪: “ᮃᮊᮤ, ᮔᮤᮔᮤ, ᮅᮛᮀ ᮙᮔ ᮙᮔᮦᮂ ᮒᮦᮂ? ᮞᮤᮀ ᮓᮩᮊᮩᮒ᮪ ᮊᮓᮤᮉ, ᮅᮜᮂ ᮊ ᮓᮤᮒᮥ, ᮊᮏᮅᮂ”.

ᮃᮊᮤ-ᮃᮊᮤ ᮏᮩᮀ ᮔᮤᮔᮤ ᮍᮝᮀᮞᮥᮜ᮪ ᮕᮧᮊ᮪ᮔ: “ᮔᮥᮠᮥᮔ᮪, ᮌᮥᮞ᮪ᮒᮤ, ᮃᮛᮤ ᮛᮧᮛᮧᮙ᮪ᮕᮧᮊ᮪ ᮏᮤᮞᮤᮙ᮪ ᮊᮥᮛᮤᮀ ᮓᮤ ᮊᮝᮥᮀ ᮕᮥᮌᮥᮁ, ᮓᮥᮕᮤ ᮍᮛᮔ᮪ ᮃᮊᮤ ᮌᮔ᮪ᮓᮝᮛᮤ”.

ᮓᮤᮅᮔ᮪ᮏᮥᮊ᮪ᮊᮩᮔ᮪ ᮊᮥ ᮕᮤᮝᮛᮍᮔ᮪ ᮚᮦᮔ᮪ ᮆᮒ ᮅᮛᮀ ᮊᮙ᮪ᮕᮥᮀ ᮊᮝᮥᮀ ᮕᮥᮌᮥᮁ.

ᮌᮔ᮪ᮎᮀᮔ ᮆᮒ ᮃᮊᮤ-ᮃᮊᮤ ᮏᮩᮀ ᮔᮤᮔᮤ-ᮔᮤᮔᮤ ᮓᮤᮞᮅᮁ ᮊᮥ ᮛᮏ ᮒᮔ᮪ᮕᮄᮍᮔ᮪.

ᮘᮛᮀ ᮓᮧᮀᮊᮕ᮪ ᮊ ᮕᮚᮥᮔᮩᮔᮔ, ᮊᮥ ᮛᮏ ᮓᮤᮕᮛᮤᮊ᮪ᮞ: “ᮃᮊᮤ ᮒᮦᮂ ᮘᮧᮌ ᮃᮔᮊ᮪ ᮃᮒᮝ ᮠᮨᮔ᮪ᮒᮩ?”

ᮕᮤᮅᮔ᮪ᮏᮥᮊ᮪ ᮃᮊᮤ ᮌᮔ᮪ᮓᮝᮛᮤ: “ᮞᮥᮙᮥᮠᮥᮔ᮪, ᮌᮓᮥᮂ ᮒᮤᮜᮥ ᮜᮜᮊᮤ ᮉᮀᮊᮥᮜ᮪, ᮃᮛᮤ ᮜᮔ᮪ᮎᮩᮊ᮪ᮔ ᮊᮤ ᮌᮤᮛᮤ, ᮊᮓᮥᮃ ᮊᮤ ᮜᮥᮀᮞᮤ, ᮊᮒᮤᮜᮥ ᮊᮤ ᮒᮔ᮪ᮕᮄᮍᮔ᮪; ᮔᮍᮤᮀ ᮃᮔᮥ ᮘᮥᮀᮞᮥ, ᮍᮛᮔ᮪ ᮊᮤ ᮒᮔ᮪ᮕᮄᮍᮔ᮪, ᮓᮥᮙᮥᮌᮤ ᮊ ᮃᮚᮩᮔ ᮘᮨᮒ᮪ ᮠᮨᮔ᮪ᮒᮩ ᮃᮚ, ᮓᮥᮊ ᮊ ᮙᮔ”.

ᮌᮔ᮪ᮎᮀᮔ ᮊᮥ ᮛᮏ ᮓᮤᮛᮧᮔ᮪ᮒᮧᮊ᮪ ᮆᮒ ᮃᮊᮤ ᮌᮔ᮪ᮓᮝᮛᮤ, ᮏᮩᮀ ᮔᮤᮔᮤ ᮌᮔ᮪ᮓᮝᮛᮤ, ᮞᮁᮒ ᮘᮛᮤ ᮑᮅᮁ, ᮓᮝᮥᮠᮔᮔ: “ᮑ ᮄᮉ ᮘᮕ ᮄᮔ᮪ᮓᮥᮀ ᮊᮤ ᮒᮔ᮪ᮕᮄᮍᮔ᮪ ᮒᮦᮂ”, ᮘᮛᮤ ᮔᮍᮤᮞ᮪.

ᮌᮔ᮪ᮎᮀᮔ ᮊᮥ ᮛᮏ ᮒᮔ᮪ᮕᮄᮍᮔ᮪ ᮓᮤᮕᮤᮞᮜᮤᮔ᮪ ᮕᮍᮀᮌᮧᮔ ᮊᮥ ᮃᮔᮥ ᮞᮛᮆ ᮞᮁᮒ ᮒᮥᮜᮥᮚ᮪ ᮓᮤᮏᮨᮔᮨᮀᮊᮩᮔ᮪ ᮛᮒᮥ ᮞᮨᮕᮥᮂ.

ᮆᮒ ᮞᮓᮦᮛᮦᮊ᮪ᮔ ᮃᮔᮥ ᮓᮥᮃ ᮒᮦᮃ ᮓᮤᮕᮤᮝᮛᮀ ᮓᮤᮞᮅᮁ.

ᮕᮒᮤᮂ ᮌᮔ᮪ᮎᮀᮔ ᮄᮔ᮪ᮓᮤᮒ᮪, ᮑᮅᮁ ᮊᮤ ᮌᮤᮛᮤ ᮞᮛᮨᮀ ᮊᮤ ᮜᮥᮀᮞᮤ.

ᮒᮩ ᮜᮤᮜ ᮓᮧᮀᮊᮕ᮪ ᮊ ᮕᮚᮥᮔᮩᮔ᮪ ᮛᮏ.

ᮊᮥ ᮛᮏ ᮊᮒᮤᮍᮜᮤ, ᮒᮤ ᮓᮤᮑ ᮛᮏ ᮑᮅᮁ: “ᮃᮊᮀ, ᮊᮥᮙᮠ ᮌᮩᮞ᮪ ᮓᮤᮜᮊᮧᮔᮔ᮪ ᮞᮀᮌᮥᮕ᮪ ᮊ ᮄᮔ᮪ᮓᮥᮀ ᮊ ᮘᮕ ᮘᮛᮦᮒᮧ ᮒᮦᮂ?”

ᮍᮝᮀᮞᮥᮜ᮪ ᮛᮊᮔ: “ᮞᮥᮙᮥᮠᮥᮔ᮪, ᮒᮩ ᮃᮎᮔ᮪ ᮒᮤᮔ ᮙᮁᮌᮤ ᮠᮨᮔ᮪ᮒᮩ ᮃᮚ ᮘᮨᮊᮨᮜ᮪ᮔ”.

ᮞᮅᮁ ᮛᮏ: “ᮔ ᮊᮥᮙᮠ, ᮊᮕᮔ᮪ ᮕᮞᮀᮌᮥᮕᮔ᮪ ᮙᮤᮞ᮪ᮒᮤ ᮓᮤᮜᮊ᮪ᮞᮔᮊᮉᮔ᮪. ᮃᮛᮤ ᮒᮩ ᮘᮧᮌ ᮕᮤᮘᮨᮊᮨᮜᮩᮔᮔ ᮙᮂ, ᮠᮨᮌ᮪, ᮊᮅᮜ ᮙᮦᮛᮦ, ᮏᮩᮀ ᮘᮤᮞᮤ ᮠᮚᮀ ᮙᮀᮙᮧᮛᮧᮊᮩᮔ᮪, ᮒᮂ ᮊᮥᮓᮔ, ᮒᮂ ᮃᮔ᮪ᮏᮤᮀᮔ, ᮒᮂ ᮘᮨᮓᮤᮜ᮪ᮔ, ᮒᮂ ᮌᮧᮘᮀᮔ”.

ᮃᮛᮤ ᮄᮉ, ᮔᮥ ᮞᮅᮛᮀ ᮓᮩᮄ, ᮘᮤᮞᮤ ᮛᮦᮊ᮪ ᮑᮞᮕᮔ᮪ᮊᮩᮔ᮪, ᮒᮂ ᮞᮕᮤᮔ, ᮒᮂ ᮒᮙ᮪ᮘᮀᮔ”.

ᮞᮊᮤᮒᮥ ᮓᮝᮥᮠᮔ᮪ ᮛᮏ.

ᮌᮔ᮪ᮎᮀᮔ ᮆᮒ ᮞᮓᮦᮛᮦᮊ᮪ᮔ ᮓᮀᮓᮔ᮪ ᮞᮌᮝᮦ-ᮌᮝᮦᮔ.

ᮊᮘᮦᮂ ᮒᮚ ᮔᮥ ᮛᮠᮚᮥ: ᮔᮥ ᮙᮧᮛᮧ ᮓᮤᮠᮊᮔ᮪ ᮘᮌᮧᮀ, ᮃᮔᮥ ᮑᮞᮕᮔ᮪ ᮓᮤᮃᮙᮥᮊ᮪ ᮊᮥ ᮞᮕᮤ ᮓᮤᮏᮜᮔ᮪.

ᮛᮏ ᮒᮔ᮪ᮕᮄᮍᮔ᮪ ᮒᮥᮜᮥᮚ᮪-ᮒᮥᮙᮥᮜᮥᮚ᮪ ᮛᮠᮚᮥᮔ ᮓᮤ ᮔᮌᮛ ᮒᮔ᮪ᮏᮥᮀ ᮛᮨᮞᮤᮊ᮪.

ᮠᮁᮒᮤᮔ: ᮕᮞᮀᮌᮥᮕᮔ᮪ ᮔᮥ ᮞᮧᮊ᮪ ᮊᮩᮔ ᮒᮦᮂ, ᮒᮥᮀᮒᮥᮀᮔ ᮏᮓᮤ ᮒᮩ ᮕᮥᮌᮥᮂ.

ᮒᮂ, ᮊᮤᮒᮥ ᮊᮘᮥᮊ᮪ᮒᮤᮃᮔᮔ ᮞᮕᮨᮁᮒᮤ ᮓᮥᮃ ᮏᮨᮜᮨᮙ, ᮊᮤ ᮌᮤᮛᮤ ᮏᮩᮀ ᮊᮤ ᮜᮥᮀᮞᮤ, ᮜᮔ᮪ᮒᮛᮔ᮪ ᮎᮤᮜᮊ ᮓᮤᮛᮤᮔ.

ᮕᮦᮕᮦᮜᮤᮀ. ᮃᮚ ᮠᮤᮏᮤ ᮕᮢᮤᮘᮞ, ᮘᮞᮔ: ᮌᮤᮛᮤ, ᮜᮥᮀᮞᮤ, ᮒᮔ᮪ᮕᮄᮍᮔ᮪.

ᮃᮛᮤ ᮠᮁᮒᮤᮔ ᮌᮤᮛᮤ: ᮌᮥᮔᮥᮀ, ᮜᮥᮀᮞᮤ: ᮎᮎᮤᮀ, ᮒᮔ᮪ᮕᮄᮍᮔ᮪: ᮒᮔ᮪ᮕ ᮕᮄᮍᮔ᮪; ᮔᮇᮔ᮪ ᮒᮨᮌᮨᮞ᮪ᮔ?

ᮜᮄᮔ᮪ ᮘᮘᮓᮦᮃᮔ᮪; ᮊᮤᮉ ᮒᮨᮌᮥᮂᮔ: ᮔᮇᮔ᮪-ᮔᮇᮔ᮪ ᮃᮔᮥ ᮓᮤ ᮌᮥᮔᮥᮀ ᮘᮤᮞ ᮓᮤᮊᮤᮛᮃᮔ᮪, ᮜᮧᮘᮔ ᮎᮎᮤᮀ ᮘᮤᮞ ᮓᮤᮒᮊ᮪ᮞᮤᮁ, ᮒᮒᮕᮤ ᮘᮥᮓᮤᮔ ᮏᮜ᮪ᮙ ᮠᮨᮔ᮪ᮒᮩ ᮘᮩᮔᮀ ᮓᮤᮓᮧᮀᮓᮧᮔ᮪.

Kairaga.com © 2017
Twitter Auto Publish Powered By : XYZScripts.com